قائداعظم ٹرافی لاہور شالیمار نے کراچی وائٹس کو زیر کرلیا

اسلام آباد کے ڈائمنڈ اسٹیڈیم میں میزبان ٹیم نے اپنی دوسری اننگز میں 60.2 اوورز میں 209رنز بناکرملتان کوکامیابی کا ہدف دیا. فوٹو: فائل

---

قائد اعظم ٹرافی کے پہلے رائونڈ میں میں لاہور شالیمار نے اعزازچیمہ کی شاندار بولنگ کی بدولت کراچی وائٹس کو 10 وکٹوں سے ہرا کر 9 قیمتی پوائنٹس حاصل کرلیے۔

کوئٹہ کو کراچی بلوز کے خلاف اننگز کی شکست کاسامنا ہے، اسلام آباد نے ملتان کو 209 رنز کا ٹارگٹ دیدیا،شان مسعود نروس نائنٹیز کا شکار ہوگئے، جبکہ حیدرآباد کو ایبٹ آباد کے خلاف کامیابی کے لیے 290 درکار ہیں۔نیشنل اسٹیڈیم میں میں ہونے والے میچ کی پہلی اننگز میں 170 رنز پر ڈھیر ہونے والی کراچی وائٹس کی مضبوط ٹیم دوسری اننگز میں بھی اعزاز چیمہ کی بولنگ کی تاب نہ لاسکی اور41.5 اوورز میں142 رنزپرآئوٹ ہوکرشکست سے دوچار ہوگئی۔

سعد علی نے اپنی ٹیم کو بچانے کی کوشش کرتے ہوئے 58 رنز اسکور کیے، انھوں نے11مرتبہ گیندکوبائونڈری کے پار پہنچایا، سرفراز احمد 23 رنز کے ساتھ ناقابل شکست رہے، پہلی اننگز میں 6 کھلاڑیوں کو واپس ڈریسنگ روم بھیجنے والے اعزاز چیمہ نے دوسری اننگز میں بھی طوفانی بولنگ کرتے ہوئے 62 رنز دیکر 4 کھلاڑیوں کو پولین پہنچایا اور میچ میں 10 وکٹ حاصل کرنے اعزاز حاصل کیا، اسطرح پہلی اننگزمیں 254 رنز اسکور کرنے والی مہمان ٹیم کو کامیابی کے لیے59 رنزکا آسان ہدف ملاجو اس نے 22 ویں اوور میںکوئی وکٹ گنوائے بغیر ہی حاصل کرلیا،گروپ اے میں این بی پی اسٹیڈیم میں کوئٹہ کو کراچی بلوز کے خلاف اننگز کی شکست سے بچنے کے لیے290 رنز درکار ہیں جبکہ اسکی 3 وکٹ موجود ہیں۔

کراچی بلوز نے اپنی پہلی اننگز 9وکٹ کے نقصان پر 509بناکر ڈیکلئیر کردی تھی،جس کے جواب میں تیسرے روز کے کھیل کے اختتام پر کوئٹہ نے اپنی پہلی اننگز میں7وکٹ گنوا کر 212 رنز بنائے، تیمورعلی نے74اور بدر علی نے 52رنز جوڑ کر اپنی ٹیم کوممکنہ شکست سے بچانے کوشش کی، جبکہ میزبان ٹیم کے اعظم حسین اور مصباح خان نے بالترتیب46 اور59 رنز دیکر3،3 وکٹ حاصل کر کے کامیابی کے امکانات روشن کردیے، حیدرآباد کے نیاز اسٹیڈیم میںکھیل کے آخری روز میزبان ٹیم کو کامیابی کے لیے 290 رنز درکارہیں اور اس کی تمام وکٹ محفوظ ہیں، قبل ازیں پہلی اننگز میں میں 228 رنز بنانے والی ایبٹ آباد کی ٹیم حیدرآباد کی پہلی اننگز170 رنز کے جواب میں دوسری اننگز میں 279 رنز بناکر آئوٹ ہوگئی،یاسر حمید نے 54،حماد علی نے 43اوروقار اورکزئی نے36 رنز کاحصہ ڈالا،شعیب لغاری نے 4،لعل کمار اور زاہد محمود نے3،3 کھلاڑیوںکو ٹھکانے لگایا۔



سرگودھا کے اسپورٹس اسٹیڈیم میںخراب موسم کے سبب دو دن بعد شروع ہونے والے میچ میں فیصل آباد نے اپنی پہلی اننگز میں 42 اوورز میں 4 وکٹ کے نقصان پر 120 رنز بنا لیے، جس میں علی وقاص کے 43اورآصف علی کے 34 رنز بھی شامل ہیں۔کامران حسین نے 3 وکٹ لیے، قبل ازیں بہاولپور کی ٹیم اپنی پہلی اننگز میں 181 بناکر آوٹ ہوگئی، عثمان طارق نے 39رنز جوڑے،نصیر اکرم اور احسان عادل نے 3،3کھلاڑیوں کو پویلین کی راہ دکھائی،اس طرح فیصل آباد کو حریف ٹیم کی برتری ختم کرنے کے لیے مزید 61 رنز درکار ہیں اور اسکی 6 وکٹ محفوظ ہیں۔

اسلام آباد کے ڈائمنڈ اسٹیڈیم میں میزبان ٹیم نے اپنی دوسری اننگز میں 60.2 اوورز میں 209رنز بناکرملتان کوکامیابی کا ہدف دیا،شان مسعود ایک رن کی کمی سے اپنی سنچری مکمل نہ کرسکے ان کے99 رنز میں 9 چوکے بھی شامل تھے نعیم انجم نے 41 رنز کی شراکت ڈالی،راحت علی نے 73 رنز کے عوض 4 کھلاڑیوں کو میدان سے باہر بھیجا، بارش اور خراب موسم کے باعث 2 دن کا کھیل نہ ہونے کے بعد دونوں ٹیمیں اپنی پہلی اننگز سے دستبردار ہوگئیں تھیں،گجرات کے ظہورالٰہی اسٹیڈیم پر تیسرے روز بھی خراب موسم کے سبب میچ کا آغاز نہ ہوسکا۔