شرجیل خان اور خالد لطیف کا فکسنگ الزامات ماننے سے انکار

 کراچی: پی ایس ایل میں اسپاٹ فکسنگ کے الزام میں معطل کرکٹرز شرجیل خان اور خالد لطیف نے فکسنگ الزامات ماننے سے انکار کردیا ہے۔

پی ایس ایل میں اسپاٹ فکسنگ کے الزام میں معطل کرکٹرز شرجیل خان اور خالد لطیف نے اپنے وکلاء کی مدد سے چارج شیٹ کا جواب تیار کر لیا ہے۔ ذرائع کے مطابق چارج شیٹ کے جواب میں پلیئرز نے ایک الزام کے علاوہ تمام الزامات کو تسلیم کرنے سے انکار کیا ہے، دونوں نے اعتراف کیا کہ انہوں نے بکی کے رابطہ کرنے پر حکام کو نہیں بتایا، ڈسپلن کی اس خلاف ورزی کا پہلے بھی اعتراف کر چکے ہیں، اس کے علاوہ تمام الزامات بے بنیاد ہیں، ہم نے اسپاٹ فکسنگ کی ہے نہ ہی ملک کو بیچا ہے۔ کرکٹرز کی جانب سے چارج شیٹ کا جواب کل تک پاکستان کرکٹ بورڈ کو موصول ہو جائے گا۔