جامعہ کراچی چوریوں کا معمہ حل سراغ رساں کتا ملزم تک پہنچ گیا

دوسری واردات کی کھوج میں کتا ایچ ای جے انسٹی ٹیوٹ پہنچ گیا، معمہ حل کرنے کیلیے سینٹر کے کیمروں کی فوٹیج حاصل کرنیکافیصلہ۔ فوٹو: فائل

---

CHENNAI: جامعہ کراچی کی انتظامیہ سراغ رساں کتے کی مدد سے پرنٹنگ پریس میں چوری کی دو مختلف وارداتوں میں سے ایک واردات کے ملزم تک پہنچنے میں کامیاب ہوگئی ہے جبکہ چوری کی دوسری واردات میں سراغ رساں کتے کے بعد اب ایچ ای جے انسٹی ٹیوٹ کے سی سی ٹی وی کیمرے کی مدد حاصل کرنے کافیصلہ کیا گیا ہے۔

ایچ ای جے انسٹی ٹیوٹ کے سی سی ٹی وی کیمرے کی فوٹیجزسراغ رساں کتے کی نشاندہی کے بعد حاصل کی جارہی ہیں،جامعہ کراچی کی انتظامیہ نے پرنٹنگ پریس اوراس کے دفترمیں یکے بعد دیگرے نقد رقم اور2 ہزاراسناد کی چوری کے معاملے پر سراغ رساں کتے کی مدد حاصل کی پرنٹنگ پریس کے دفترسے چندروز قبل 26 ہزار روپے کی رقم چوری ہوئی تھی جس کے بعد ایک روز قبل سراغ رساں کتے کوپرنٹنگ پریس کے دفترمیں اس مقام پر لایا گیا جہاں سے رقم چوری ہوئی تھی یونیورسٹی ذرائع کے مطابق انسان کے پسینے کی بو سونگنے کی صلاحیت رکھنے والا کتا متعلقہ مقام سے براہ راست پریس کے اس کمرے میں جاکر بیٹھ گیا جہاں پرپریس کے ملازم کا دفتر موجود ہے۔



یونیورسٹی انتظامیہ کی جانب سے یہ ''مشق'' مسلسل تین باردہرائی گئی اورتینوں بارسراغ رساں کتا متعلقہ ملازم کے کمرے میں جاکربیٹھ گیا، واضح رہے کہ پولیس نے بھی اسی ملازم پرشک کااظہارکرتے ہوئے اسے تھانے طلب کیا تھا، مزیدبراں جب اسناد کی چوری کے معاملے میں سراغ رساں کتے کو چوری کے مقام پرلے جایا گیا توکتا اس مقام سے نکل کرجامعہ کراچی کے ایچ ای جے انسٹی ٹیوٹ آف کیمسٹری کے سامنے جاکررک گیا جس کے بعد یونیورسٹی انتظامیہ نے فیصلہ کیا ہے چونکہ ایچ ای جے انسٹی ٹیوٹ کی جانب سے اس سڑک پرکیمرے نصب کیے گئے ہیں لہذا ان کیمروں کی فوٹیجز حاصل کی جائیں گی جس سے تحقیقات میںمددمل سکے گی اور مزید پیش رفت کاامکان ہے۔