شہر میں اتائی ڈاکٹروں کے خلاف آپریشن 468 کلینک سیل

14مقدمات درج،کارروائی تیز کی جائے ،اسناد اور لائسنس پیش کیے جائیں، ای ڈی او،عوام اتائی ڈاکٹروں و کلینکوں کی نشاندہی کریں فوٹو: فائل

---

کراچی میں اتائی ڈاکٹروں اوران کے غیرمستند کلینکوں پر چھاپوں کا سلسلہ جاری ہے۔

اب تک468کلینکوں کو متعلقہ انتظامی افسران کی موجودگی میں سیل کردیا گیا جبکہ14 اتائی ڈاکٹروں کے خلاف مقدمات درج کرلیے گئے ہیں، ان خیالات کا اظہار ای ڈی او ہیلتھ کراچی ڈاکٹر امداد اﷲ صدیقی نے ڈسٹرکٹ ہیلتھ افسران کے اجلاس سے خطاب کرتے ہوئے کیا،ڈاکٹر امداداللہ صدیقی نے کہا کہ کراچی کے18ٹاؤنز میں اب تک غیر مستند (اتائی) میڈیکل اینڈ ڈینٹل پریکٹیشنرز کے خلاف کی گئی کارروائی سے انھیں مطلع کیا گیا۔

انھوں نے بتایا کہ اب تک 482 اتائی کلینکس پر چھاپے مارے گئے ان میں سے14اتائی ڈاکٹروںکے خلاف ایف آئی آر بھی درج کروائی گئی،468 جعلی کلینکس کو متعلقہ اسسٹنٹ کمشنر کی موجودگی میں سیل کیا گیا اور اتائیوںکو نوٹس ارسال کیے گئے کہ وہ اپنی اسناد اور لائسنس کے ساتھ متعلقہ ٹائون ہیلتھ آفیسرزکو رپورٹ کریں، ای ڈی او ہیلتھ نے ان کارروائیوں پر اپنے اعتماد کا اظہارکیا اور اس میں مزید تیزی لانے کی تاکید کی۔



مزید برآں ایگزیکٹو ڈسٹرکٹ ہیلتھ افسر کراچی نے عوام کو بھی آگاہ کیا کہ وہ غیر مستند میڈیکل اور ڈینٹل پریکٹیشنرز سے علاج کروا کر اپنی صحت اور زندگیوںکوخطرے میں نہ ڈالیں بلکہ ایسے اتائی ڈاکٹروں کی نشاندہی کرکے اپنا قومی فریضہ ادا کریں اورمعاشرے کو ایسے ناسوروں سے پاک کرنے میں اپنا کردار اداکریں، انھوں نے مزید کہا کہ اس مقصد کے لیے اپنے متعلقہ ٹائون ہیلتھ آفیسرز یا ای ڈی او ہیلتھ، چھٹی منزل سوک سینٹر، حسن اسکوائر یونیورسٹی روڈ کراچی یا فون نمبر 021-99230246 پر مکمل اعتماد کے ساتھ رابطہ کرکے اطلاع دیں جبکہ معلومات فراہم کرنے والے تمام افراد کی شناخت اور نام مکمل طور پر صیغہ راز میں رکھا جائے گا۔