معروف براڈ کاسٹر پروڈیوسر آغا ناصر انتقال کرگئے

 اسلام آباد: معروف براڈ کاسٹر، پروڈیوسر اور ڈائریکٹر آغا ناصر رضائے الہٰی سے انتقال کرگئے۔

1937 میں ممبئی میں پیدا ہونے والے آغا ناصر پاکستان میں سرکاری ریڈیو اور ٹی وی پر کئی اہم ترین عہدوں پر تعینات رہے۔ انہوں نے 1955 میں ریڈیو پاکستان سے بحیثیت براڈکاسٹر اپنے کریئر کا آغاز کیا، بعد ازاں وہ ادارے کے ڈائریکٹر جنرل کے عہدے پر بھی فائز رہے۔ 1964 میں جب پاکستان میں ٹیلی ویژن چینل کی بنیاد رکھی گئی تو وہ بھی بطور ہدایت کار اور پروڈیوسر اس سے منسلک ہوگئے۔ وہ کچھ عرصے کے لیے پی ٹی وی کے مینیجنگ ڈائریکٹر بھی رہے۔

آغا ناصر نے ریڈیو پاکستان میں “اسٹوڈیو نمبر 9″ اور “حامد میاں کے یہاں” جب کہ پاکستان ٹیلی وژن میں “الف نون ،تعلیم بالغان جیسے شاہکار ڈرامے تخلیق کئے۔ 1970 کے عام انتخابات براہ راست نشریات بھی ان کے کیرئیر میں اہم سنگ میل کی حیثیت رکھتی ہے. انہوں نے کئی فلموں کی ہدایت کاری بھی کی، ان کی زیر ہدایت فلموں میں وحید مراد اور طلت اقبال جیسے اداکاروں نے کام کیا۔

آغا ناصر ایک اچھے مصنف بھی تھے انھوں نے کل چھ کتابیں تحریر کیں اور ان کی ثقافت پر تحریروں کو کافی پسند کیا گیا۔ انھیں ان کی خدمات کے نتیجے میں صدارتی تمغہ برائے حسنِ کارکردگی سے بھی نوازا گیا۔آغا ناصر کافی عرصے سے علیل تھے، انہیں اسلام آباد میں ہی سپرد خاک کیا جائے گا۔

آغا ناصر کے انتقال پر صدر ممنون حسین اور وزیر اعظم نواز شریف نے گہرے دکھ اور افسوس کا اظہار کرتے ہوئے کہا ہے کہ فنی میدان میں مرحوم کی خدمات کو ہمیشہ یاد رکھا جائے گا۔