رنویر کے گھر والوں نے دپیکا کو شادی کا جوڑا تحفے میں دیدیا

ویب ڈیسک  پير 8 جنوری 2018
دپیکا کی سالگرہ کے موقع پر دونوں نے یہ وقت سری لنکا میں ایک ساتھ گزارا؛ فوٹوفائل

دپیکا کی سالگرہ کے موقع پر دونوں نے یہ وقت سری لنکا میں ایک ساتھ گزارا؛ فوٹوفائل

ممبئی: بھارتی کپتان ویرات کوہلی اور انوشکا شرما کی شادی کے بعد اب دپیکا پڈوکون اور رنویر سنگھ کی شادی کی خبریں میڈیا پر گردش کررہی ہیں۔

ابھی ویرات انوشکا کی شادی کا ہنگامہ ختم بھی نہیں ہوا تھا کہ اداکارہ دپیکا پڈوکون اور رنویر سنگھ کی شادی کا ہنگامہ شروع ہوگیا۔ دپیکا پڈوکون اور رنویر سنگھ بہترین اداکار ہونے کے ساتھ ایک دوسرے کے بہت اچھے دوست بھی ہیں دونوں کو کئی بار مختلف مقامات پر ایک ساتھ دیکھا گیا ہے جب کہ 5 جنوری کو دپیکا کی 32 ویں سالگرہ کے موقع پر دونوں سری لنکا میں موجود تھے جہاں انہوں نے کافی وقت ایک ساتھ گزارا، جس کے بعد سے یہ افواہیں گردش کرنے لگی تھیں کہ دونوں منگنی کرنے والے ہیں، تاہم حال ہی میں رنویر کے گھر والوں کی جانب سے دپیکا کو ساڑھی اور انگوٹھی تحفے کے طور پر دئیے جانے کی خبروں نے دونوں کی شادی کی افواہوں کومزید تقویت دے دی ہے۔

اس خبرکوبھی پڑھیں: دپیکا کے ساتھ ایک بھی سین نہ ہونے پر رنویر رنجیدہ

بھارتی میڈیا کے مطابق رنویر کے گھر والوں نے دپیکا کو ڈیزائنر سبیاساچی مکھرجی کی ڈیزائن کردہ ساڑھی گفٹ کی ہے، یہ وہی ڈیزائنر ہیں جنہوں نے انوشکا شرما کی شادی کے لباس ڈیزائن کیے تھے جب کہ ساڑھی کے ساتھ انہوں نے دپیکا کو ہیرے کا خوبصورت سیٹ بھی بطور تحفہ دیا ہے جس میں ہیرے کی خوبصورت انگوٹھی بھی شامل ہے۔ رنویر کے گھر والوں کی جانب سے ساڑھی اور سیٹ دئے جانے پر یہ  کہا جارہا ہے کہ ساڑھی  رنویر کے گھر والوں کی جانب سے دپیکا کوشادی کے جوڑے کے طور پر دی گئی ہے۔

اس خبرکوبھی پڑھیں: رنویر جب ساتھ ہو تو پھر کسی کی ضرورت نہیں ہوتی

دوسری جانب رنویر دپیکا کی سری لنکا میں موجودگی کے حوالے سےیہ بھی کہا جارہا ہے کہ دونوں نے سری لنکا میں چپکے سے منگنی کرلی ہے اور بہت جلد ویرات انوشکا کی طرح شادی کرکے دھماکا کریں گے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔