ٹریفک قوانین کی خلاف ورزی پر جرمانے میں اضافہ

جرمانوں میں اضافے کا نوٹیفکیشن جاری کردیا گیا،جرمانے میں 100 فیصد سے زائد اضافے سے قوانین کی خلاف ورزی میں کمی ہوگی،ڈی آئی جی ٹریفک عبدالخالق شیخ. (فوٹوایکسپریس)

---

لاہور: ٹریفک قوانین میں ترمیم کے بعد خلاف ورزی پر کیے جانے والے چالان کی مد میں جرمانے کی رقم میں کئی گنا اضافہ کر دیا گیا۔

ٹریفک پولیس قوانین کی آگاہی کیلیے اگلے ماہ ایک مہم شروع کر رہی جس میں کالجز اور یونیورسٹی کے طلبا بھی حصہ لیں گے جو اہم سڑکوں پر شہریوں کو قوانین کی آگاہی کے لیے پمفلٹ اور ہینڈ بلز تقسیم کریں گے، جرمانے میں100 فیصد سے زائد اضافے سے ٹریفک قوانین کی خلاف ورزی میں کمی واقع ہوگی، ان خیالات کا اظہار ڈی آئی جی ٹریفک عبدالخالق شیخ نے اپنے دفتر میں صحافیوں سے بات چیت کرتے ہوئے کیا، اس موقع پر اے ڈی آئی جی ٹریفک ڈاکٹر قمر رضوی ، ایس ایس پی ویسٹ ذوالفقار اور ایس ایس پی ایسٹ اظفر بھی موجود تھے۔

ڈی آئی جی ٹریفک عبدالخالق شیخ نے کہا کہ حکومت سندھ کے ٹرانسپورٹ ڈپارٹمنٹ نے جرمانوں کی رقم میں اضافے کا باقاعدہ نوٹیفکیشن جاری کیا ہے جس میں موٹر وہیکل آرڈیننس 1965 کے سیکشن 116-A میں ترمیم کرتے ہوئے ٹریفک قوانین کی مختلف اقسام کی52خلاف ورزیوں کے جرمانے کی رقم میں اضافہ کیا گیا ہے۔

انھوں نے بتایا کہ اس وقت شہر میں سب سے زیادہ ہونے والی ٹریفک قوانین کی خلاف ورزیوں میں مال بردار گاڑیوں میں اوور لوڈنگ کا جرمانہ100سے بڑھا کر 1000 روپے، بغیر ڈرائیونگ لائسنس کے گاڑی چلانے پر جرمانہ 300 سے بڑھا کر 1000 روپے ، بغیر فٹنس کے گاڑی سڑک پر لانے کا جرمانہ 100 سے بڑھا کر 2000 روپے ، ایک ہی خلاف ورزی دو بار کرنے پر کیا جانے والا جرمانہ 400 سے بڑھا کر 2000 روپے ، غفلت و لاپروائی سے گاڑی چلانے کا جرمانہ 100 روپے سے بڑھا کر 2000 روپے، غیر رجسٹرڈ گاڑی (AFR) کا جرمانہ 100 سے بڑھا کر 1000 روپے ، کالے شیشے والی گاڑیوں کا چالان 200 سے 500 ، سگنل توڑنے کا جرمانہ 200 سے 500 ، ون وے کی خلاف ورزی پر جرمانہ 100 سے 500 ، بغیر ہیلمٹ50 سے 300 روپے، دھواں چھوڑنے والی گاڑیوں کا جرمانہ 200 سے 400 روپے ، پریشر ہارن کا جرمانہ 250 سے 400 روپے جبکہ پولیس کی جانب سے روکے جانے کی خلاف ورزی پر کیا جانے والا جرمانہ 200 سے بڑھا کر 1000 روپے کر دیا گیا۔



جبکہ اس کے علاوہ دیگر جرمانوں کی مد میں بھی اضافہ کر دیا گیا ہے، عبدالخالق شیخ نے کہا کہ ہے کہ نگراں وزیر اعلیٰ سندھ کی جانب سے بھی ٹریفک جام کے مسائل پر فوری قابو پانے کے لیے حکمت عملی کی ہدایات جاری کی گئی ہے اور اس سلسلے میں انھوں نے سب سے پہلے الیکٹرانکس مارکیٹ کی انتظامیہ سے بات چیت کی ہے اور بے ہنگم طریقے سے پارک کی گئی گاڑیوں اور فٹ پاتھ پر سے تجاوزات ہٹانے کی بات چیت ہوئی ہے۔

انھوں نے کہا کہ ٹریفک کی روانی کو بہتر بنانے کے لیے شارع فیصل ار ایم اے جناح روڈ پر بھی ہنگامہ بنیادوں پر اقدامات کیے جائیں گے اور اس سلسلے میں کمشنر کراچی اور دیگر محکموں سے بھی مدد طلب کی جائے گی، انھوں نے بتایا کہ اگلے مہینے 8 اپریل سے ٹریفک قوانین کی آگاہی کے حوالے سے ایک مہم شروع کی جا رہی ہے جس کا باقاعدہ آغاز میٹرو پولیس ٹریفک چوکی سے کیا جائے گا اور اس سلسلے میں پولیس نے مختلف بینرز ، پمفلٹس اور ہینڈ بلز تیار کیے ہیں جبکہ ان کی تقسیم کے لیے یونیورسٹی اور کالجز کے طلبا بطور والینٹیئرز شہر کی اہم شاہراہوں پر پمفلٹس اور ہینڈ بلز تقسیم کریں گے۔

انھوں نے صحافیوں سے بھی اپیل کی ہے کہ وہ بھی رضاکارانہ طور پر پولیس کی اس مہم میں حصہ لیں، انھوں نے کہا کہ سرکاری و نجی اسکولوں میں بھی زیر تعلیم بچوں کو ٹریفک قوانین کی آگاہی کے لیے حکمت مرتب کی گئی ہے ، انھوں نے بتایا کہ شہر میں موجود 176سگنلز میں سے 46 سگنلز خراب ہیں۔