کراچی انتخابی جلسوں ریلیوں اور کارنر میٹنگز کیلئے اجازت لینا ہوگی

وزارت داخلہ میںمرکزی کنٹرول روم قائم کردیاگیا،الیکشن کے لیے 27سیکیورٹی اینڈ کوآرڈی نیشن کمیٹیاں قائم کرنے کافیصلہ فوٹو: فائل

---

لاہور: محکمہ داخلہ سندھ نے الیکشن کمیشن آف پاکستان کی جانب سے انتخابی مہم کیلیے مرتب کردہ ضابطہ اخلاق پرعملدرآمدکرانے اورسیکیورٹی کیلیے پلان مرتب کرلیاہے۔

ذرائع کے مطابق سندھ بھرمیں30مارچ سے 9مئی تک انتخابی مہم کے دوران کسی بھی سیاسی یامذہبی جماعت کوانتخابی مہم کیلیے جلسہ،ریلی یاکارنر میٹنگ منعقد کرنے کیلیے باقاعدہ اجازت نامہ(این او سی)حاصل کرناہوگا۔یہ اجازت نامہ متعلقہ اضلاع کے ڈپٹی کمشنرز جاری کریں گے،انتخابی مہم کے دوران صوبے بھرمیں اسلحہ کی نمائش یااسلحہ ساتھ لیکرچلنے پر مکمل پابندی ہوگی۔

کسی جماعت کارہنما یا امیدوار انتخابی مہم کے دوران اپنی حفاظت کیلیے رکھے گئے سیکیورٹی گارڈزکی باقاعدہ اجازت محکمہ داخلہ سے حاصل کرے گا ، انتخابی مہم کے دوران سیاسی رہنماؤں اور امیدواروں کو اشتعال انگیزاور مذہبی منافرت پھیلانے والی تقاریر کرنے پر پابندی عائد ہوگی،تمام جماعتیں انتخابی پوسٹرز،بینرز اورپمفلٹس الیکشن کمیشن کی ہدایات کے مطابق آویزاںکریں گی جبکہ لاؤڈ اسپیکر کااستعمال بھی الیکشن کمیشن کے ضابطہ اخلاق کے مطابق کیا جائے گا۔



انتخابی جلسوں یاریلیوں میں ہوائی فائرنگ یاپٹاخوںکااستعمال بھی ممنوع ہوگا۔ذرائع نے مزید بتایا کہ اگرکسی جماعت کوانتخابی جلسے یا ریلی کیلیے سیکیورٹی ضرورت ہوگی تووہ48گھنٹے قبل متعلقہ ضلع کے ڈپٹی کمشنرزکے توسط سے محکمہ داخلہ سے رجوع کرے گاتاکہ جلسہ یاانتخابی ریلی کیلیے سیکیورٹی انتظامات کویقینی بنایاجاسکے۔ ذرائع نے مزیدبتایاکہ انتخابی جلسوں یاریلیوں کے انعقاد کیلیے تمام سیاسی جماعتیں اس بات کی پابند ہوںگی کہ وہ سیکیورٹی انتظامات کیلیے محکمہ داخلہ،متعلقہ ضلع کے ڈپٹی کمشنرز اورتمام قانون نافذ کرنے والے اداروں سے مکمل تعاون کریں گی ۔

ذرائع کے مطابق وفاقی حکومت کی ہدایت پرحکومت سندھ نے کراچی سمیت صوبے بھرمیں پرامن انتخابات،الیکشن کمیشن سے رابطے اورسیکیورٹی انتظامات کیلیے چیف سیکریٹری سندھ کی سربراہی میں ایک اعلیٰ سطح کی سیکیورٹی کوآرڈی نیشن کمیٹی قائم کردی ہے،یہ کمیٹی صوبے میں انتخابی مہم اور11مئی کوپولنگ کے دوران کراچی سمیت سندھ بھر میںامن وامان کی صورتحال کو یقینی بنانے اور سیکیورٹی انتظامات کے حوالے سے اقدامات کرے گی ۔

ذرائع کے مطابق محکمہ داخلہ سندھ نے عام انتخابات کے انعقاد کے موقع پر 27سیکیورٹی اینڈ کوآرڈی نیشن کمیٹیاں قائم کرنے کا فیصلہ کیاہے۔ذرائع کے مطابق ان سیکیورٹی کمیٹیوں کے سربراہ متعلقہ ضلع کے ڈپٹی کمشنرز ہوںگے،پولنگ کے روزکراچی کو سیکیورٹی کے لحاظ سے3زونزمیں تقسیم کیاجائے گا،پہلے زون میں انتہائی حساس ترین،دوسرے زون میں حساس اور تیسرے زون میں نارمل پولنگ اسٹیشنز کے لحاظ سے سیکیورٹی پلان کو مرتب کیا جائے گا۔