لاوارث گھومنے والے بہن بھائی کو ایدھی فاؤنڈیشن نے تحویل میں لے لیا

دونوں بہن بھائی بنگلے کی نشاندہی کرنے سے قاصرہیں جہاں پران کی دادی انھیں گھریلو کام کیلیے چھوڑکرگئی تھی،ایدھی رضا کار۔ فوٹو؛ ایکسپریس

---

ڈیفنس فیز ٹو میں لاوارث حالت میں گھومنے والے دو بہن بھائیوں کو علاقہ مکین کی اطلاع پر ایدھی فاؤنڈیشن نے اپنی حفاظتی تحویل میں لے لیا۔

ایدھی فاؤنڈیشن کے سربراہ فیصل عبدالستار ایدھی نے بتایا کہ ڈیفنس فیز ٹو کے ایک مکین نے ایدھی فاؤنڈیشن کو اطلاع دی تھی کہ گلی کے کونے پر دو کمسن لڑکا اور لڑکی بیٹھے ہیں جو کچھ دیر سے علاقے میں گھوم رہے تھے اور رو بھی رہے ہیں جس پر ایدھی کے رضا کاروں نے موقع پر پہنچ کر دونوں کو اپنی حفاظتی تحویل میں لے کر ایدھی ہیڈ آفس میٹھادر پہنچا دیا جہاں پر انھوں نے اپنا نام 8 سالہ عیشا اور 6 سالہ جمیل ولد نصیر بتایا جو کہ بہن بھائی ہیں۔

ایدھی رضا کاروں نے مزید بتایا کہ دونوں بہن بھائی نے بتایا کہ ان کی دادی ڈیفنس کے ایک بنگلے میں کام پر لگا کر گئی تھیں اور آج بنگلے کے صاحب نے ہمیں گھر سے نکال دیا جس کے بعد وہ گلیوں میں گھوم رہے ہیں، بچوں کا آبائی تعلق رحیم یار خان سے ہے تاہم دونوں بہن بھائی اس بنگلے کی نشاندہی کرنے سے قاصر ہیں جہاں پر ان کی دادی انھیں گھریلو کام کاج کے لیے چھوڑ کر گئی تھی۔