تینوں خانز پر بالی ووڈ کے 600 کروڑ روپے داؤ پر

2018 میں سلمان خان پر 230 کروڑ ، عامر خان پر 210 جب کہ شاہ رخ خان پر 150 کروڑ روپے لگے ہیں

ویب ڈیسک April 11, 2018

تینوں خانز سلمان، شاہ رخ اور عامر خان پر ہر سال کروڑوں روپے کی سرمایہ کاری کی جاتی ہے؛ فوٹوفائل

ISLAMABAD: بالی ووڈ پر راج کرنے والے تینوں خانز سلمان، شاہ رخ اور عامر خان پر ہر سال کروڑوں روپے کی سرمایہ کاری کی جاتی ہےرواں سال بھی تینوں خانز پر بھارتی فلم انڈسٹری نے اربوں روپے کی رقم لگائی ہے۔

بھارتی میڈیا کے مطابق فلموں کی کامیابی کی ضمانت سمجھے جانے والےبالی ووڈ کے تینوں خانزسلمان، شاہ رخ اور عامر خان پر بھارتی فلم انڈسٹری میں ہر سال اربوں روپے لگائے جاتے ہیں اور اتنا ہی نہیں اس رقم میں ہر سال اضافہ ہوتا جاتاہے کیونکہ بھارت کے علاوہ پوری دنیا کے شائقین بالی ووڈ کے کسی دوسرے اداکار کے مقابلے میں تینوں خانز کی فلمیں دیکھنا زیادہ پسند کرتے ہیں۔ اس سال بھی تینوں خانز پر تقریباً600 کروڑ کی سرمایہ کاری کی گئی ہے جب کہ سلمان خان کی فلموں پر باقی دونوں خانز سے زیادہ تقریباً 230 کروڑ کی رقم لگائی گئی ہے۔ یہی وجہ ہے کہ سلمان کے جیل جانے کی صورت میں بھارتی فلمسازوں اور پروڈیوسروں کو اپنا پیسہ ڈوبنے کا خطرہ پیدا ہوگیا تھا تاہم دبنگ خان کی ضمانت کے باعث ان کی جان میں جان آئی۔

سلمان خان کی رواں سال دو فلمیں ''ریس3''اور''دبنگ3''ریلیز ہوں گی دونوں فلموں کا بجٹ کروڑوں میں ہے جب کہ ریلیز سے قبل ہی دونوں فلموں کی سپر ہٹ ہونے کی پیش گوئی کی جارہی ہے۔

بالی ووڈ کے مسٹر پرفیکشنسٹ عامر خان ''ٹھگ آف ہندوستان''کے ساتھ رواں سال میدان میں اتریں گے، فلم کا بجٹ 210 کروڑ روپے ہے جس کے ساتھ یہ فلم رواں سال کی دوسری مہنگی ترین فلم قراردی جارہی ہے۔

بالی ووڈ میں پچھلے کچھ عرصے سے مشکلات کا شکار بالی ووڈ کنگ شاہ رخ خان بھی اس سال فلم''زیرو''کے ذریعے ایک بار پھر اپنی دھاک جمانے آئیں گے۔ 150 کروڑ کے بجٹ سے بنائی گئی فلم میں شاہ رخ خان کے علاوہ اداکارہ کترینہ کیف اور انوشکا شرما مرکزی کردار ادا کرتی نظرآئیں گی۔