سگریٹ سیمنٹ کاسمیٹکس اشیا مہنگی اسٹیشنری کھاد پولٹری مصنوعات سستی

تنخواہ دارملازمین کیلیے ٹیکس چھوٹ کی حد 12 لاکھ ہوگی،قرآن کی طباعت کیلیے کاغذ، آلوکی درآمد پرٹیکس چھوٹ دینے کافیصلہ

Irshad Ansari April 27, 2018

فارما انڈسٹری پر سیلز ٹیکس عائد کیا جائے گا،ذرائع۔ فوٹو: فائل

وفاقی حکومت نے آئندہ مالی سال 2018-19 کے وفاقی بجٹ میں سگریٹ، سیمنٹ اور کاسمیٹک سمیت دیگر اشیا مہنگی جبکہ کتابیں کاپیاں و سٹیشنری کا دیگر سامان، کھاد اور پولٹری مصنوعات سستی کرنیکا فیصلہ کیا ہے۔

وزارت خزانہ کے اعلیٰ افسر نے ''ایکسپریس'' کو بتایا کہ آئندہ مالی سال کے وفاقی بجٹ میں ایل این جی کی درآمد اور سپلائی پر عائد سیلز ٹیکس کی شرح میں کمی کرنیکا فیصلہ کیا گیا ہے جبکہ ایل این جی پر عائد ویلیو ایڈیشن ٹیکس بھی ختم کیا جارہا ہے۔

ڈیری و لائیو سٹاک کو ٹیکس سے چھوٹ دی جارہی ہے جبکہ ڈیری مصنوعات کی درآمد پر عائد ڈیوٹی کی شرح بھی کم کی جارہی ہے۔ آلو کی درآمد پر عائد سیلز ٹیکس کی شرح بھی صفر کی جارہی ہے۔ کتابوں، کاپیوں، پنسلوں سمیت دیگر سٹیشنری اشیاء پر عائد سیلز ٹیکس کی شرح بھی صفر کرنیکا فیصلہ کیا گیا ہے۔ فرٹیلائزر پر عائد جنرل سیلز ٹیکس کی شرح بھی کم کی جارہی ہے۔

قرآن پاک کی طباعت کیلئے استعمال ہونیوالے پیپر کی درآمد پر عائد جنرل سیلز ٹیکس کی چھوٹ دی جارہی ہے۔ ہوٹل و موٹل انڈسٹری کو سہولت دینے کیلئے درآمدی سامان پر کسٹمز ڈیوٹی کی شرح بھی کم کی جارہی ہے۔ کمپیوٹر پارٹس و آلات پر بھی سیلز ٹیکس اور ڈیوٹی کی شرح میں کمی لائی جارہی ہے۔

مقامی سطح پر تیار ہونے والے سگریٹ پر عائد کردہ فیڈرل ایکسائز ڈیوٹی کی شرح میں اضافہ کرنیکا فیصلہ کیا گیا ہے۔ سیمنٹ پر عائد فیڈرل ایکسائز ڈیوٹی کی شرح میں بھی اضافہ کرنیکا فیصلہ کیا گیا ہے جس کے باعث سگریٹ اور سیمنٹ مہنگا ہونیکا امکان ہے۔ فارما انڈسٹری پر سیلز ٹیکس عائد کرنیکا فیصلہ کیا گیا ہے۔

تنخواہ دار ملازمین کیلئے انکم ٹیکس سے چھوٹ کیلئے آمدنی کی حد چار لاکھ روپے سے بڑھا کر بارہ لاکھ روپے کی جارہی ہے۔