کپتانی چھوڑنے میں پونٹنگ کا کوئی ہاتھ نہیں گوتم گمبھیر

بہت سوچ بچار اور اپنی ناقص پرفارمنس کو مدنظر رکھتے ہوئے فیصلہ کیا، کپتان دہلی ڈیئر ڈیولز

Sports Desk April 28, 2018

بہت سوچ بچار اور اپنی ناقص پرفارمنس کو مدنظر رکھتے ہوئے فیصلہ کیا، کپتان دہلی ڈیئر ڈیولز ۔ فوٹو: انٹرنیٹ

آئی پی ایل فرنچائز دہلی ڈیئر ڈیولز کے کپتان گوتم گمبھیر نے کہا ہے کہ کپتانی چھوڑنے میں کوچ رکی پونٹنگ کا ہاتھ نہیں تھا۔

گوتم گمبھیر نے گزشتہ دنوں ٹیم کی ناقص پرفارمنس کے بعد قیادت چھوڑنے کا اعلان کرکے سب کو چونکا دیا تھا، اس کے بعد یہ قیاس آرائیاں شروع ہوگئی ہیں کہ ان پر کپتانی چھوڑنے کا پریشر تھا اور اس میں کوچ رکی پونٹنگ کا ہاتھ تھا لیکن انھوں نے اس بات سے انکار کیا ہے۔

دوسری جانب لیفٹ ہینڈ اوپننگ بیٹسمین کا کہنا ہے کہ میں نے بہت سوچ بچار اور اپنی ناقص پرفارمنس کو مدنظر رکھتے ہوئے یہ فیصلہ کیا، تاہم عوامی حلقوں کا کہنا ہے کہ ان کو کپتانی چھوڑنے کیلیے کہا گیا ہے۔

آئی پی ایل میں دہلی ڈیئر ڈیولز کی ٹیم ناقص پرفارمنس کی وجہ سے آخری نمبر پر براجمان ہے، گوتم گمبھیر کا کہنا ہے کہ ٹیم کی خراب کارکردگی میں ان کا بھی کردار ہے کیونکہ انھوں نے پہلے6 میچوں میں اب تک صرف 85 رنز بنائے ہیں۔

ایک بیان میں ان کا کہنا تھا کہ کنگز الیون پنجاب کے ہاتھوں اپنی ٹیم کی شکست کے بعد میرے ضمیر نے مجھے جھنجوڑا کہ میں اس ذمے داری کے قابل نہیں رہا اور اب مجھے کپتانی سے سبکدوش ہوجانا چاہیے۔

گوتم گمبھیر کا کہنا تھا کہ دوستوں نے بہت سمجھانے کی کوشش لیکن میں اپنے فیصلے پر قائم ہوں، ان کا کہنا تھا کہ ماضی میں انھوں نے ایک 2 میچوں میں خراب کارکردگی پر امت مشرا اور کولن منرو جیسے کھلاڑیوں کو ڈریسنگ روم میں بٹھا دیا تھا، اب خود کپتانی چھوڑنا بھی درست قدم ہے۔