جون اسنر نے کلے کورٹ پر پہلی ٹرافی حاصل کر لی

ہوسٹن:یو ایس کلے کورٹ ٹینس چیمپئن شپ کے فائنل میں امریکی اسٹار جون اسنر اسپینش حریف نکولس الماگرو کیخلاف گیند ریٹرن کررہے ہیں ، انھوں نے ٹائٹل اپنے نام کرلیا۔ فوٹو : اے ایف پی

---

جون اسنر نے نکولس الماگرو کے امریکی سرزمین پر پہلا ٹائٹل جیتنے کا خواب پورا نہیں ہونے دیا۔

امریکی اسٹار نے یوایس کلے کورٹ ٹینس چیمپئن شپ جیت لی، یہ کلے کورٹ پر اسنر کا اولین ٹائٹل ہے، کامیابی پر انھیں 82 ہزار ڈالرکی انعامی رقم ملی، ادھر مونٹی کارلو ماسٹرز ٹینس کے سنگلز میں فرنچ پلیئر جائلز سیمون ابتدا ہی میں ناکامی سے دوچار ہوگئے جبکہ نکولائی ڈیوڈنکو اور میخائل یوزنی نے دوسرے راؤنڈ میں قدم رکھ دیا۔

تفصیلات کے مطابق اسپین کے ٹاپ سیڈ نکولس الماگرو کو یوایس کلے کورٹ چیمپئن شپ کے فائنل میں میزبان اسٹار جون اسنر نے اسٹریٹ سیٹ میں 6-3 اور 7-5 سے شکست دے دی، دونوں پلیئرز رواں سیزن میں پہلی مرتبہ کسی ایونٹ کے فائنل میں پہنچے لیکن اسنر نے حریف پر برتری لیتے ہوئے2013 کا پہلا ٹائٹل جیت کر اپنی مجموعی ٹرافیزکی تعداد6 کرلی، الماگرو بھی کلے کورٹ کے منجھے ہوئے پلیئر خیال کیے جاتے ہیں،انھوں نے بھی اب تک اپنے کیریئر کے تمام 12 ٹائٹل اسی طرز کے کورٹ پر کھیلتے ہوئے جیتے۔

جاندار سروس کے لیے مشہور دراز قامت اسنر نے الماگرو کیخلاف فیصلہ کن معرکے میں7 ایسز لگائیں، ریور اوکس کنٹری کلب میں منعقدہ اس ایونٹ میں جون اسنر نے گذشتہ برس فائنل میں ناکامی کا ازالہ کرتے ہوئے اس مرتبہ ٹائٹل اپنے نام کرلیا،81 منٹ جاری رہنے والے مقابلے میں ان کی سروس صرف ایک مرتبہ بریک ہوئی،کامیابی کے بعد میڈیا سے گفتگو میں اسنر نے کہا کہ میں ہمیشہ سے جانتا ہوں کہ کلے پر عمدہ کھیل پیش کرسکتا ہوں، میں نے ستمبر کے بعد کلے کورٹ پر پہلی مرتبہ گیند کو ہٹ کیا لیکن بتدریج ردھم اور اعتماد پاتا گیا۔



ایونٹ میں میرا دوسرا مقابلہ خاصا کانٹے دار رہا، رنر اپ الماگرو نے کہا کہ اسنر نے فائنل میں بہت شاندار کھیل پیش کیا، اس نے جارحانہ انداز کھیل اپنائے رکھا، حریف کی سروس میرے لیے بہت مشکل بنی رہی، میں اس جیت پر اسنر کو مبارکباد پیش کرتا ہوں، وہ بہت اچھا پلیئر ہونے کے ساتھ عمدہ شخصیت کا بھی مالک ہے،گزشتہ برس کے فائنل میں جوآن مناکو کے ہاتھوں شکست کھانے والے اسنر نے اس مرتبہ ارجنٹائنی حریف کو سیمی فائنل میں ہی ٹھکانے لگاکر حساب چکتا کرلیا تھا، ورلڈ نمبر23 اسنر اس سے قبل کھیلے گئے دومیچز میں الماگرو سے شکست کھاچکے تھے۔

لیکن اس مرتبہ کامیابی سے ریکارڈ2-1 کرلیا۔دوسری جانب مونٹی کارلو ماسٹرز ٹینس کے سنگلز فرسٹ راؤنڈ میچز میں فن لینڈ کے جارکونمینن نے وکٹر ٹروسکی کو6-1 اور 6-2 سے ہرا دیا، فرانس کے بنیوئٹ پائر نے کروشین حریف ایوان ڈوڈگ کو 6-4،6-4 سے قابو کیا، روس کے نکولائی ڈیوڈنکو نے جرمن کوالیفائر ڈینئیل برانڈز کو 6-3،6-4 سے زیر کرلیا۔

11 سیڈ فرنچ پلیئر جائلز سیمون کو اسپین کے روبرٹو بسٹیٹا اگٹ نے6-3 اور 7-6 سے اپ سیٹ شکست دی،اسپین کے پبلو الیجاندرو نے فرانس کے جیریمی شارڈے کو 6-7،7-5 اور 6-2 سے قابو کرلیا، ڈچ پلیئر روبن ہاس کو فرنچ پلیئر ایڈورڈو روجر ویسلن نے اسٹریٹ سیٹ میں 6-3،6-2 سے ہرایا،کینیڈا کے میلوس راؤنک نے جولین بینیٹو کو6-1،6-4 سے مات دی، اطالوی پلیئر فابیو فوگنینی نے ہموطن آندریس سیپی کے لیے آغاز ہی انجام بنا دیا، ان کی جیت کا اسکور 3-6،6-4 اور 6-4 رہا، روس کے میخائل یوزنی نے اسپینش حریف ڈینئیل گیمینو ٹریور کو 6-4،6-0 سے ٹھکانے لگایا۔