ٹرین 25 سیکنڈ پہلے روانہ کرنے پر جاپانی کمپنی کی معذرت

ٹرین کو 7 بج کر 12 منٹ پر روانہ ہونا تھا لیکن اس نے 25 سیکنڈ پہلے پلیٹ فارم چھوڑ دیا تھا

ویب ڈیسک May 17, 2018

ٹرین کو 7 بج کر 12 منٹ پر روانہ ہونا تھا لیکن اس نے 25 سیکنڈ پہلے پلیٹ فارم چھوڑ دیا تھا (فوٹو:فائل)

جاپان میں ایک کمپنی کو مقررہ وقت سے صرف 25 سیکنڈ پہلے ٹرین روانہ کرنے پر معذرت کرنا پڑگئی۔

آج کے مصروف دور میں سفری سہولیات کے ساتھ ساتھ وقت کی پابندی لازمی ہے اور یہی وجہ ہے کہ بس ہو یا ٹرین یا پھر ہوائی جہاز، یہ سروس فراہم کرنے والے ادارے منٹوں کی نہیں بلکہ سیکنڈز کو بھی انتہائی اہمیت دیتے ہیں۔

یہ بھی پڑھیں: جہاز کے بجائے بس کے ذریعے منزل تک جلدی پہنچانے والے طویل رُوٹس

ایسا ہی ایک واقعہ مغربی جاپان میں پیش آیا جہاں ایک ٹرین سروس فراہم کرنے والی کمپنی کو وقت کی پابندی نہ کرنے پر عوام سے معافی مانگنا پڑ گئی۔ شیگا شہر کے نوٹوگوا اسٹیشن پر ایک ٹرین جسے 7 بج کر 12 منٹ پر روانہ ہونا تھا اس نے 25 سیکنڈز پہلے پلیٹ فام چھوڑ دیا۔

ٹرین سروس فراہم کرنے والی کمپنی کا کہنا ہے کہ غلطی سے ٹرین کو سات بج کر 11 منٹ اور 35 سیکنڈز پر روانہ کردیا گیا جو کہ مقررہ وقت سے 25 سیکنڈ پہلے روانہ ہوئی اس پر ہم معذرت خواہ ہیں۔