1000 پولیس افسران کی انتخابی فرائض کی تربیت مکمل ہوگئی

کراچی کے 400 افسران اور اہلکاروں کو الیکشن میں امن امان برقرار رکھنے کیلیے سعیدآباد ٹریننگ سینٹر میں خصوصی تربیت دی گئی. فوٹو: ایکسپریس

---

کراچی سمیت صوبے بھر میں عام انتخابات کے روز سیکیورٹی ڈیوٹیز پر تعینات 1000 پولیس افسران اور اہلکاروں کو ممکنہ پرتشدد واقعات کو کنٹرول کرنے اور امن امان کی صورتحال کو برقرار رکھنے کی خصوصی تربیت فراہم کردی گئی ہے۔

تفصیلات کے مطابق الیکشن کمیشن کی جانب سے آئی جی سندھ شاہد ندیم بلوچ کو ہدایات جاری کی گئیں تھیں کہ عام انتخابات کے روز سیکیورٹی ڈیوٹیز پر تعینات پولیس افسران اور اہلکاروں کو خصوصی تربیت دی جائے اس سلسلے میں کراچی سمیت صوبے بھر میں ایک ہزار سے زائد پولیس افسران و اہلکاروں کو عام انتخابات کے روز ممکنہ پر تشدد واقعات کو کنٹرول کرنے اور متاثرہ علاقوں میں امن امان برقرار رکھنے کیلیے ایک ہفتے پر مشتمل تربیت فراہم کردی گئی ہے۔



ڈی آئی جی ٹریفک اظہر رشید نے ایکسپریس کو بتایا کہ اندرون سندھ میں600 اور کراچی میں400 افسران اور اہلکاروں کو تربیت فراہم کی گئی ہے انھوں نے بتایا کہ اندرون سندھ میں600 پولیس افسران و اہلکاروں کو لاڑکانہ پولیس ٹریننگ سینٹر اور کراچی میں400 اہلکاروں کو سعید آباد پولیس ٹریننگ سینٹر میں تربیت دی گئی ہے،تربیت حاصل کرنے والے پولیس افسران و اہلکار کا تعلق پولیس کے مختلف رینج اور ڈویژن سے ہے اور تربیت حاصل کرنیوالے افسر اور اہلکار اپنی اپنی رینج اور ڈویژن میں پولیس افسران اور اہلکاروں کو تربیت فراہم کریں گے جس کے بعد خصوصی تربیت حاصل کرنے والے پولیس افسران و اہلکاروں کی تعداد کئی ہزار ہوجائے گی ۔