دریائے چناب پرحفاظتی بند ٹوٹنے سے کئی دیہات زیر آب آ گئے

لاہور: دریائے چناب میں پانی کی سطح میں مسلسل اضافے کے باعث حفاظتی بند ٹوٹنے سے 5 دیہات زیر آب آ گئے۔

ایکسپریس نیوز کے مطابق دریائے چناب میں پانی کی سطح میں مسلسل اضافے کی وجہ سے دریا پر بنا بند ٹوٹ گیا اور 5 دیہات زیرِ آب آگئے۔ زیرِآب آنے والے دیہاتوں میں چک پنیار، ماڑی، رامکے، بہل پور اور شہبازپور شامل ہے۔ بند ٹوٹنے کی خبر ملتے ہی ریسکیو کی ٹیمیں دیہاتوں میں پہنچ گئیں اور متاثرہ خاندانوں کی محفوظ مقامات کی جانب منتقل کردیا گیا۔

حکام کا کہنا ہے کہ بند ٹوٹنے کے باعث زمینوں میں کام کرنے والے کسان اور مال مویشی متاثر ہوئے جن کی مدد کے لئے ریسکیو 1122 سمیت امدادی ٹیمیں علاقہ میں پہنچا دی گئی ہیں جب کہ شہباز پور کے قریب ڈیرہ پر پھنسے 7 افراد کو ریسکیو کر لیا گیا ہے جب کہ مزید افراد کی نشاندہی کے بعد ان کی مدد کے لئے ٹیمیں بھیجی جارہی ہیں تاہم ابھی تک کسی جانی نقصان کی کوئی اطلاع موصول نہیں ہوئی۔