جیریمی ہنٹ برطانیہ کے نئے وزیرخارجہ مقرر

جیریمی ہنٹ بطور وزیر صحت بھی خدمات انجام دیتے رہے ہیں۔ فوٹو : فائل

---

برطانوی وزیر اعظم تھریسامے نے جیریمی ہنٹ کو برطانیہ کا نیا وزیر خارجہ مقرر کردیا ہے۔

بین الاقوامی خبر رساں ادارے کے مطابق برطانوی وزیر خارجہ بورس جانسن کے مستعفی ہوجانے کے بعد وزیراعطم تھریسامے نے وزارت خارجہ کی ذمہ داری جیریمی ہنٹ کو سونپ دی ہے۔ نئے وزیر خارجہ جیریمی ہنٹ وزیراعظم تھریسامے کے قابل اعتماد ساتھی اور بطور وزیر صحت بھی خدمات انجام دیتے رہے ہیں۔

برطانوی وزیراعظم تھریسامے کو یورپی یونین سے اخراج سے متعلق پالیسی پر اپنے حریفوں کے ساتھ ساتھ حلیفوں کی جانب سے بھی تنقید کا سامنا ہے۔ ناقدین نے اس پالیسی کو تجارتی سرگرمیوں کے لیے ناکافی کہا ہے کیونکہ اس سے یورپی یونین اور برطانیہ کے درمیان علیحدگی کے بعد معاشی سرگرمیوں کا حل نہیں نکالا گیا ہے۔

Huge honour to be appointed Foreign Secretary at this critical moment in our country’s history. Time to back our PM to get a great Brexit deal - it's now or never...

— Sir Jeremy Hunt MP (@Jeremy_Hunt) July 9, 2018

واضح رہے کہ برطانیہ کے عوام نے ریفرنڈم میں یورپی یونین سے علیحدگی کے حق میں فیصلہ دیا تھا ۔ اب برطانیہ کو یورپی یونین سے انخلاء کے عمل کو 29 مارچ 2019 تک مکمل کرنا ہے تاہم یورپی یونین اور برطانیہ کے درمیان تجارتی سرگرمیوں کے حوالے سے لائحہ عمل پر تاحال اتفاق نہیں ہوسکا ہے۔