واشنگٹن ٹینس اینڈی مرے کی 17 ماہ بعد ہارڈ کورٹ میں فاتحانہ واپسی

پہلے راؤنڈ میں میکنزی میکڈونلڈ کو ہرا دیا،ویمنز ایونٹ میں وکٹوریا آذرنیکا نے ابتدائی مرحلہ عبور کرلیا،کرسٹینا میک ہیل کو ماریا سے مات فوٹو : اے ایف پی

---

برطانوی ٹینس اسٹار اینڈی مرے نے17 ماہ بعد ہارڈکورٹ پر فاتحانہ واپسی کرلی۔

انھوں نے واشنگٹن اوپن کے پہلے راؤنڈ میں میزبان کھلاڑی میکنزی میکڈونلڈ کو 3-6، 6-4 اور7-5 سے مات دیدی، سان جونز ویمنز ٹینس ایونٹ میں بیلاروسی اسٹار وکٹوریا آذرنیکا نے پہلا مرحلہ عبور کرلیا، کرسٹینا میک ہیل کو ابتدائی آزمائش میں یونانی پلیئر ماریا سیکاری کے ہاتھوں شکست کا سامنا کرنا پڑا۔

تفصیلات کے مطابق برطانوی ٹینس اسٹار اینڈی مرے تقریباً 17 ماہ بعد ہارڈ کورٹ پر فاتحانہ واپسی کرنے پر جذباتی ہوگئے، انھوں نے واشنگٹن اوپن کے پہلے راؤنڈ میں میزبان کھلاڑی میکنزی میکڈونلڈ کو 3-6، 6-4 اور7-5 سے مات دے دی،دائیں ہپ کی سرجری کے سبب اینڈی کھیل سے دوری اختیار کرنے پر مجبور ہوئے، انھوں نے اس سے قبل جون میں کوئنز اوپن ٹینس کے گراس کورٹ میں بھی چند مسابقتی میچز کھیلے تھے لیکن پھر خاطرخواہ فٹنس حاصل نہ ہوپانے پر انھوں نے ومبلڈن میں شرکت سے گریزکیا تھا، انھوں نے یہاں میکنزی کیخلاف دو گھنٹے 37 منٹ کی جدوجہد کے بعد غلبہ حاصل کیا، مرے نے اس سے قبل مارچ2017 میں آخری بار انڈین ویلز کے ہارڈ کورٹ ایونٹ میں حصہ لیا تھا، جہاں پر انھیں اپنے ابتدائی میچ میں شکست ہوگئی تھی، دوسرے مرحلے میں ان کا سامنا برطانوی فورتھ سیڈ کائل ایڈمنڈ سے ہوگا۔

جنھوں نے پہلے راؤنڈ میں بائی ملی تھی، انھوں نے کہا کہ مجھے دوسرے مرحلے میں کامیابی کیلیے زیادہ محنت کرنا ہوگی، زیادہ جارحانہ انداز اپنا ہوگا، دیگرمیچزمیں تیونس کے مالک جزیری نے روسی پلیئر ایوگینے ڈونسکوئے کو 6-4 اور6-1 سے شکست دیکر پیشقدمی جاری رکھی، دوسرے راؤنڈ میں ان کا سامنا تھرڈ سیڈ اور دفاعی چیمپئن الیگزینڈر زیوریف سے ہوگا، امریکی وائلڈ کارڈ انٹری پلیئر نوہا روبن نے روسی حریف میخائل یوزنی کو 6-4،6-4 سے زیر کرلیا، اب ان کی دوسری آزمائش جون اسنر سے ہوگی، ٹم سیمزک نے ریکارڈیکس بیرینکس کو 7-6(7/4)،6-2 سے ہرادیا، پولینڈ کے ہوبرٹ ہورکیز نے بیلاروسی حریف ایلیا ایواشکا کیخلاف 6-4،6-3 سے کامیابی سمیٹ لی۔

رومانیہ کے میریوس کوپیل نے بوسنیا سے تعلق رکھنے والے مرزا باسک کو 7-6 (11/9)،6-4 سے قابو کیا۔ویمنز سنگلز فرسٹ راؤنڈ مقابلوں میں جرمنی کی آندریا پیٹکووک نے امریکی حریف جیمی لیوب کیخلاف 6-1،6-1 سے کامیابی کو اپنا مقدر بنالیا، سویٹلانا کزنٹسووا نے کرسٹی آہن کو 6-2،6-1 سے مات دی، کیٹی بولٹر نے الیکسینڈرا کورنیک کو 6-2،6-0 سے زیر کیا، امریکا کی ایلی کیسک نے چینی کھلاڑی ہان ژن یوآن کو 6-2،6-3 سے مات دی، ہنگری کی فینی اسٹولر نے مایو ہیبی کیخلاف 6-1، 7-6(8/6) سے فتح کو اپنا مقدر بنالیا۔ دوسری جانب سان جوز ویمنز ٹینس ایونٹ میں بیلاروسی اسٹار وکٹوریا آذرنیکا نے یوکرین کی کیٹرینا بوندرنیکو پر 6-3، 6-7(7/9)،7-5 سے غلبہ حاصل کیا، یونان کی ماریا سیکاری نے کرسٹینا میک ہیل کو اسٹریٹ سیٹ میں 6-2، 6-2 سے ہرادیا، سوفیہ کینن نے ویرونسیا کیپڈے کیخلاف 6-4،6-4 سے فتح پائی، ایجلا ٹومل جینووچ نے جورجینا گارشیا کو 6-4،6-1 سے مات دی، امریکا کی ڈینیلی کولنز نے ڈینیلی لاؤ کیخلاف 7-6(7/2)،6-3 سے کامیابی پائی۔