فلمی سین میں سری دیوی کو نہ پہچاننے پر مداحوں کی رشی کپور پر کڑی تنقید

ویب ڈیسک  اتوار 5 اگست 2018
سری دیوی کو نہ پہچاننے پر سوشل میڈیا صارفین نے رشی کپور کو بڑھتی ہوئی عمر اور شراب نوشی کا طعنہ دیا (فوٹو: فائل)

سری دیوی کو نہ پہچاننے پر سوشل میڈیا صارفین نے رشی کپور کو بڑھتی ہوئی عمر اور شراب نوشی کا طعنہ دیا (فوٹو: فائل)

ممبئی: بالی ووڈ کے معروف اداکار رشی کپور آنجہانی اداکارہ سری دیوی کو نہ پہچاننے پر بُری طرح کڑی تنقید کا نشانہ بن گئے۔

بالی ووڈ اداکار رشی کپور اداکاری کے ساتھ ساتھ بے معنی تبصروں کی بدولت سوشل میڈیا پر کافی متحرک ہیں اور اپنے بے باک مؤقف کے باعث متعدد دفعہ تنازعات کا شکار ہوچکے ہیں جب کہ اپنے منفی رویئے اور عدم برداشت کی وجہ سے صحافیوں اور مداحوں پر بھی تشدد کر چکے ہیں۔

اس بار رشی کپور کو اُس وقت تنقید کا سامنا کرنا پڑا جب انہوں نے اپنے ساتھ موجود ایک ویڈیو میں آنجہانی اداکارہ سری دیوی کو پہچاننے سے انکار کردیا۔

بھارتی میڈیا رپورٹس کے مطابق رشی کپور نے ٹویٹر پر اپنی اور اداکارہ سری دیوی کی چند سیکنڈ کی ویڈیو شیئر کی اور ساتھ ہی انہوں نے پوچھا کہ یہ فلم کون سی ہے اور اس ویڈیو میں موجود اداکارہ کون ہیں میں پہچان نہیں سکا۔

صف اول کی اداکارہ کے ساتھ فلم ’چاندنی، ’نگینہ‘ اور ’گرو دیو‘ جیسی مشہور فلموں میں مرکزی کردار ادا کرنے والے رشی کپور کی سمجھ سے بالاتر ٹویٹ پر سوشل میڈیا صارفین نے انہیں شدید تنقید کا نشانہ بنایا۔ کسی نے انہیں بڑھتی ہوئی عمر کا طعنہ دیا تو کسی نے انہیں شراب نوشی کے زیادہ استعمال کی وجہ سے بیمار ذہن قرار دیا۔

دیپا بھٹیا نامی صارف نے کہا کہ ’آج آپ کو کوئی نہیں پہچانتا اگر آپ سری دیوی کے ساتھ نگینہ اور چاندنی جیسی فلموں میں کام نہ کرتے۔

ایک شہری روہت پنگالیا نے رشی کپور پر تنقید کرتے ہوئے کہا کہ شراب کا کثیر استعمال صحت کے لیے نقصان دہ ہے۔

https://twitter.com/bsmtool/status/1025617809697636352

کلبیر سنگھ نے کہا کہ ویڈیو میں موجود اداکارہ سری دیوی ہیں جب کہ اُن کے ساتھ کھڑے اداکار کو نہیں پہچان سکا۔

یہ خبر بھی پڑھیں: رشی کپور نے بیٹے کے لیے راجکمار ہیرانی کی ماں کے پاؤں پکڑ لیے

واضح رہے کہ بالی ووڈ کی آنجہانی اداکارہ سری دیوی کچھ ماہ قبل دبئی کے ہوٹل میں ٹب میں ڈوب جانے کے باعث ہلاک ہوگئی تھیں۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔