شقی القلب شوہر نے تیزاب ڈال کر جواں سال بیوی کو مار دیا

پولیس نے مقتولہ کی ماں جمیلہ مسیح کی مدعیت میں قتل کا مقدمہ شوہر جمشید کے خلاف درج کر لیا۔ فوٹو: فائل

---

سکندر آباد کالونی میں 21 خاتون پر اس کے ظالم شوہر نے مبینہ طور پر تیزاب ڈال دیا اور خاتون کو شدید زخمی حالت میں میکے چھوڑ کر فرار ہو گیا۔

مریم نے اسپتال میں دم توڑ دیا، پولیس نے شوہر کے خلاف مقدمہ درج کر لیا۔ تفصیلات کے مطابق کوٹری سکندر آباد کالونی کی رہائشی 21 سالہ مریم مسیح کو جھلسی ہوئی تشویشناک حالت میں سول اسپتال حیدرآباد لایا گیا، جہاں وہ زخموں کی تاب نہ لاتے ہوئے دم توڑ گئی۔ لاش کا ڈسٹرکٹ اسپتال کوٹری میں پوسٹ مارٹم کرایا گیا، جس میں ہلاکت کی وجہ تیزاب سے جھلسنا بتائی گئی۔



پولیس نے مقتولہ کی ماں جمیلہ مسیح کی مدعیت میں قتل کا مقدمہ شوہر جمشید کے خلاف درج کر لیا۔ تاہم کوئی گرفتاری عمل میں نہیں ا ٓسکی۔ مقتولہ 4 سالہ بچے کی ماں تھی۔ ماں جمیلہ کے مطابق مریم کی شادی5 سال قبل کراچی فیڈرل بی ایریا کے رہائشی جمشید عرف مندی سے ہوئی تھی۔ گزشتہ روز داماد اس کی بیوی کو شدید جھلسی ہوئی حالت میں لایا اور گھر چھوڑ کر فرار ہو گیا۔ وہ اپنی بیٹی کو سول اسپتال لے کر گئی، جہاں اس نے موت سے قبل بتایا کہ شوہر جمشید نے اس پر تیزاب پھینکا تھا۔