قبضہ مافیا گروپ کا سرغنہ منشا بم سپریم کورٹ سے گرفتار

 اسلام آباد: پولیس نے قبضہ مافیا گروپ کے سرغنہ منشا بم کو سپریم کورٹ سے گرفتار کرلیا۔

ایکسپریس نیوز کے مطابق جوہر ٹاؤن لاہور میں سرگرم قبضہ مافیا گروپ کا سرغنہ منشا بم آج صبح گرفتاری دینے سپریم کورٹ پہنچا تھا جس پر پولیس نے اسے گرفتار کرلیا، پنجاب پولیس کی ٹیم ملزم منشا بم کو لاہور منتقل کرے گی۔

سپریم کورٹ پہنچنے کے بعد منشا بم کا کہنا تھا کہ اپنی گرفتاری دینے کے لیے سپریم کورٹ آیا ہوں۔

یہ پڑھیں: سپریم کورٹ کا منشا بم کی گرفتاری اور تمام اراضی واگزار کرانے کا حکم

واضح رہے کہ منشاء بم پر بیرون ملک مقیم پاکستانیوں کی زمین پر قبضہ کرنے کا الزام ہے جب کہ انسداد دہشت گردی کی عدالت نے منشا بم اور اس کے بیٹوں کے شناختی کارڈ بلاک کرنے کا حکم دیا تھا۔

سپریم کورٹ نے شہری کی درخواست پر سرگرم قبضہ مافیا گروپ کے سرغنہ منشا بم کے خلاف کارروائی کے لیے کیس کی سماعت کی تھی اورگرفتاری سمیت تمام اراضی واگزار کرانے کا حکم دیا تھا۔