آئی سی سی میٹنگز اینٹی کرپشن معاملات پر گفتگو ہوگی

 احسان مانی سنگاپور روانہ ہو گئے، سبحان احمد بھی اجلاس میں شریک ہوں گے فوٹو:فائل

---

آئی سی سی میٹنگز میں شرکت کیلیے چیئرمین پی سی بی احسان مانی پیر اور منگل کی درمیانی شب سنگاپور روانہ ہو گئے۔

سی او او سبحان احمد پہلے ہی وہاں پہنچ چکے ہیں، منگل سے شروع ہونے والی میٹنگز ہفتے تک جاری رہیں گی، احسان مانی ان میں شریک ہونے کے ساتھ دیگر بورڈز سے تعلقات بہتر بنانے کیلیے بھی ملاقاتیں کریں گے۔ آئی سی سی میٹنگز میں اینٹی کرپشن معاملات پر گفتگو ہوگی، تیزی سے سراٹھاتی محدود اوورز کی لیگز کے حوالے سے بھی اہم فیصلے متوقع ہیں، نئی لیگز کی منظوری کیلیے قوانین سخت اور پلیئرز پر ایک برس میں محدود لیگز کھیلنے کی پابندی بھی متوقع ہے۔

ٹیسٹ چیمپئن شپ کے پوائنٹس سسٹم کو حتمی شکل دی جائے گی، 2028 اولمپکس میں کرکٹ کو شامل کرانے کے حوالے سے تبادلہ خیال ہوگا، ارکان کو زمبابوے کرکٹ کے حوالے سے اپ ڈیٹ کیا جائے گا۔ ایک مشروب ساز کمپنی کی سابق چیف ایگزیکٹیو اندرا نوئی پہلی بار آئی سی سی کی غیر جانبدار خاتون ڈائریکٹر کے طور پر میٹنگ میں شریک ہوں گی۔