قومی اسمبلی کے آئندہ اجلاس میں شرکت کے لئے عمران خان اسلام آباد پہنچ گئے

اسلام آ باد: شوکت خانم اسپتال کے معالجین کی جانب سے مکمل صحت مند قرار دیئے جانے کے بعد پاکستان تحریک انصاف کے چیئرمین عمران خان اسلام آنباد پہنچ گئے ہیں جہاں وہ قومی اسمبلی اجلاس میں شرکت کریں گے۔ 

جمعرات کی صبح عمران خان کو ان کی رہائش گاہ زمان پارک سے سخت سکیورٹی میں شوکت خانم اسپتال لے جایا گیا جہاں ڈاکٹروں کے پینل کا ان کا مکمل طبی معائنہ کیا، نیورو سرجن ڈاکٹر کامران نے عمران خان کی ریڑھ کی ہڈی، مہروں اور گردن کا بھی تفصیلی معائنہ کیا اور ریڑھ کی ہڈی کی موجودہ کیفیت کو تسلی بخش قرار دیا،جس کے بعد عمران خان  خصوصی طیارے سے لاہور سے اسلام آباد پہنچے جہاں سے وہ راولپنڈی کے علاقے سیٹلائٹ ٹاؤن میں انتخابات کے روز جاں بحق ہونے والے پارٹی کارکن عثمان مرزا کے گھر گئے  اور ان کے اہل خانہ سے تعزیت کی۔

کارکن کے اہل خانہ سے تعزیت کے بعد میڈیا سے بات کرتے ہوئےعمران خان نے کہا کہ انہوں نے عثمان مرزا کی وجہ سے ہی حلقہ این اے 56 کی نشست اپنے پاس رکھی اگر یہ واقعہ نہ ہوتا تو وہ میانوالی والی نشست اپنے پاس رکھتے۔ انہوں نے کہا کہ عثمان مرزا کے  قاتلوں کو جب تک گرفتار نہییں کیا جاتا وہ چین سے نہیں بیٹھیں گے۔

واضح رہے کہ عمران خان 11 مئی کے انتخابات سے چند روز قبل اسٹیج پر جانے والے لفٹر سے گر کر زخمی ہو گئے تھے، گرنے  کی وجہ سے ان کی گردن اور کمر پر شدید چوٹیں آئی تھیں اور وہ کئی روز تک شوکت خانم اسپتال میں زیر علاج رہے اوراسی وجہ سے قومی اسمبلی کے افتتاحی اجلاس میں بھی شرکت نہ کرپائے،عمران خان نے انتخابات میں این اے ون پشاور، این اے 56 راولپنڈی اور این اے 71 میانوالی سے کامیابی حاصل کی تھی۔