عدالت نے تنخواہوں کی عدم ادائیگی پر ایڈمنسٹریٹر بلدیہ کو طلب کر لیا

عدالت نے ہدایت کی ہے کہ اشتہارات کیلیے ایڈور ٹائزنگ ایجنسیوں کو جاری کردہ لائسنس کی مد میں حاصل ہونے والی آمدنی کی بھی تفصیلات بتائی جائیں. فوٹو: فائل

---

ISLAMABAD: کے ایم سی ملازمین کو تنخواہیں اور پنشن ادا کرنے میں ناکام اورسیاسی جماعتوں کو فراہم کیے گئے بورڈز اور ہورڈنگز سے حاصل ہونے والی آمدنی کی تفصیلات بھی عدالت عالیہ میں پیش نہ کرسکی۔

جسٹس احمد علی ایم شیخ کی سربراہی میں دو رکنی بینچ نے ایڈمنسٹریٹر کے ایم سی کو طلب کرتے ہوئے انھیں سیاسی جماعتوں کے بینرز کیلیے فراہم کیے گئے بورڈز اور ہورڈنگز سے حاصل ہونے والی آمدنی کی تفصیلات سمیت مکمل ریکارڈ کے ہمراہ پیش ہونے کا حکم دیا ہے،عدالت نے ہدایت کی ہے کہ اشتہارات کیلیے ایڈور ٹائزنگ ایجنسیوں کو جاری کردہ لائسنس کی مد میں حاصل ہونے والی آمدنی کی بھی تفصیلات بتائی جائیں، کے ایم سی کے54 ہزار ملازمین وپنشنرزکی تنخواہوں کی ادائیگی سے متعلق درخواست کی پیر کو سماعت کے موقع پر کے ایم سی کے وکیل نے مہلت طلب کرتے ہوئے موقف اختیارکیا کہ تنخواہوں اور پنشن کی ادائیگی کے لیے حکومت سندھ سے رقم ملنے کے بعد ہی کوئی اقدام کیا جاسکتا ہے۔



اس لیے مزید مہلت دی جائے انھوں نے ہورڈنگز اور بورڈز کی مد میں ہونیوالی آمدنی کے بارے میں رپورٹ پیش کرنے کے لیے بھی مہلت طلب کی ، اس سے قبل عدالت کو بتایا گیا تھاکہ کے ایم سی نے اشتہارات آویزاں کرنے کیلیے کسی سیاسی جماعت کو بورڈز مہیا نہیں کیے بلکہ کے ایم سی ایڈورٹائزنگ ایجنسیوں کو لائسنس جاری کرتی ہے جس کے عوض ان سے فیس وصول کی جاتی ہے اور ایڈورٹائزنگ ایجنسیاں ہی سیاسی جماعتوں اور اداروں کو اشتہارات کیلیے سائٹ فراہم کرتی ہیں۔

عدالت نے ہدایت کی کہ جن سیاسی جماعتوں کو ہورڈنگز اور بورڈز فراہم کیے گئے ان کی بھی نشاندہی کی جائے اور ایڈورٹائزنگ ایجنسیوں سے حاصل ہونے والی آمدنی کی تفصیلات پیش کی جائیں،جسٹس کلب کے سربراہ ندیم شیخ ایڈوکیٹ نے بتایا کہ فائر فائٹرز کو 4ماہ سے فائر رسک الاوئنس نہیں دیا گیا،کے ایم سی کے ملازمین اور پنشنرز کی تنخواہوں سے متعلق سجن یونین اور ندیم شیخ ایڈووکیٹ کی درخواست میں کہا گیا ہے کہ کے ایم سی 32 ہزار ملازمین اور22 ہزار پنشنرزتنخواہوں سے محروم ہیں۔