وزارت دفاع نے 74 دہشت گردوں کی رہائی سپریم کورٹ میں چیلنج کردی

ویب ڈیسک  جمعرات 1 نومبر 2018
سپریم کورٹ نے درخواست منظور کرتے ہوئے اس سماعت کے لیے مقرر کردیا (فوٹو: فائل)

سپریم کورٹ نے درخواست منظور کرتے ہوئے اس سماعت کے لیے مقرر کردیا (فوٹو: فائل)

 اسلام آباد: وزارت دفاع نے سزائے موت اور عمر قید کے 74 دہشت گردوں کو رہا کرنے کے پشاور ہائی کورٹ کے حکم کو چیلنج کردیا سپریم کورٹ کل درخواست کی سماعت کرے گی۔

ایکسپریس نیوز کے مطابق وزارت دفاع نے دہشت گردوں کی رہائی کے فیصلے کے خلاف سپریم کورٹ میں اپیل دائر کردی جس میں موقف اپنایا گیا ہے کہ رہا کیے گئے مجرمان دہشت گردی کے واقعات میں ملوث تھے اور ملٹری کورٹ نے دہشت گردی میں ملوث ہونے پر مجرمان کو سزائیں دیں تاہم پشاور ہائی کورٹ نے مجرمان کو رہا کرنے کا حکم دیا۔

یہ بھی پڑھیں: فوجی عدالتوں سے پھانسی و عمرقید پانے والے 74 ملزمان کی سزائیں کالعدم قرار

اپیل میں مزید کہا گہا ہے کہ عدالت عظمیٰ پشاور ہائی کورٹ کے فیصلے کو کالعدم قرار دے کر فوجی عدالتوں کے فیصلے بحال کرے کیوں کہ رہا کردہ افراد مجرم ہیں۔

سپریم کورٹ نے درخواست منظور کرتے ہوئے اسے کل سماعت کے لیے مقرر کردیا ہے۔ سماعت جسٹس عظمت سعید کی سربراہی میں دو رکنی بینچ کرے گا۔

واضح رہے کہ 18 اکتوبر کو پشاور ہائی کورٹ نے فوجی عدالتوں کے فیصلوں کو کالعدم قرار دے کر 74 دہشت گردوں کو بری کرنے کا حکم سنایا تھا۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔