شب برأت آج عقیدت و احترام سے منائی جائیگی قبرستانوں میں استقبالیہ کیمپ لگنا بھی شروع

مختلف جماعتوں کے تحت خصوصی اجتماعات ہونگے، شب برأت کے موقع پر شہر میں بجلی کی لوڈشیڈنگ سے گریز کیا جائے، علما

Staff Reporter June 24, 2013

جہانگیر روڈ کی ایک دکان پر پھولوں کی پتیاں فروخت کی جارہی ہیں، شب برأت کے موقع پر گلاب کی پتیوں کی فروخت میں اضافہ ہوجاتا ہے۔ فوٹو: پی پی آئی

شب برأت ملک بھر کی طرح کراچی میں بھی نہایت عقیدت و احترام سے منائی جائے گی، زائرین قبرستانوں میں اپنے پیاروں کی قبروں پر پھولوں کی چادر چڑھائیں گے۔

مساجد میں شب بیداری، نوافل، درود شریف اور خصوصی دعائوں کا اہتمام ہوگا جن میں ملک کی سلامتی و استحکام اور امت مسلمہ کی سربلندی کیلیے خصوصی دعائیں کی جائیں گی،قبرستانوں میں زائرین کی رہنمائی کیلیے استقبالیہ کیمپ لگنا شروع ہوگئے ہیں، مختلف جماعتوں کے تحت خصوصی اجتماعات ہوں گے، علمائے کرام نے مطالبہ کیا ہے کہ شب برأت کے موقع پر شہر میں بجلی کی لوڈشیڈنگ سے گریز کیا جائے، جماعت اہلسنّت پاکستان کے تحت ملک بھر میں پندرھویں شعبان المعظم (شب برأت) پیر کی شب نہایت عقیدت و احترام اور مذہبی جوش و جذبے کے ساتھ منائی جائے گی، پیر اورمنگل کو نفلی روزہ رکھا جا ئے گا جبکہ شہر بھر کے قبرستانوں پر جماعت اہلسنّت پاکستان کے زیر اہتمام استقبالیہ کیمپ لگائے جائیں گے۔

شب برأت کا ایک بڑا روح پرور اجتماع میمن مسجدمصلح الدین گارڈن (کھوڑی گارڈن )میں بعد نمازمغرب ہوگا، اجتماع سے علامہ سیّد شاہ عبد الحق قادری خطاب کریں گے، دعوت اسلامی کے تحت رات تقریباً دس بجے سے عالمی مدنی مرکز فیضان مدینہ سمیت شہر کے13مقامات پر اجتماعی ذکر و نعت بسلسلہ شب برآت کا آغاز ہوجائے گا،سیلانی ویلفیئر انٹرنیشنل ٹرسٹ کے زیر اہتمام شب برأت کا مرکزی اجتماع جامع مسجد امیر حمزہ ناظم آباد پہلی چورنگی پر ہوگا جو رات ساڑھے نو بجے سے ایک بجے تک جاری رہے گا، مرکزی میلاد الائنس پاکستان کے بانی وچیف آرگنائزر محمدسلیم خان قادری ترابی حکومت سے مطالبہ کیا ہے کہ شب برأت کے موقع پر شہر میں لوڈشیڈنگ سے گریز کیا جائے۔

علاوہ ازیں اراکین قومی و صوبائی اسمبلی محبوب عالم اور سیف الدین خالد نے میونسپل کمشنر بلدیہ غربی قمر شیخ اور سپرنٹنڈنگ انجینئرکے ہمراہ اورنگی زون میں شب برأت کے سلسلے میں الفتح قبرستان،جنت البقیع قبرستان ،مرکزی قبرستان پاکستان بازار اور مختلف قبرستانوں میں خصوصی انتظامات کا جائزہ لیا، بلدیہ غربی میں موجود تمام قبرستانوں میں صفائی کے بعد جراثیم کش ادویات کا چھڑکائو بھی جاری ہے، ا نتظامیہ بلدیہ غربی کی جانب سے استقبالیہ کیمپس قائم کیے گئے ہیں، شاہ فیصل کالونی میں شب برأت کے موقع پر قبرستانوں اور عبادت گاہوں کے اطراف صفائی وستھرائی اور روشنی کے حوالے سے خصوصی انتظامات کیے گئے ہیں۔