پاک فوج ملک کی سرحدوں کی حفاظت کیلیے پر عزم ہے، آرمی چیف

ویب ڈیسک  بدھ 12 دسمبر 2018
آرمی چیف کا سندھ کے گدرا سیکٹر میں اگلے مورچوں اور تھرکول پائلٹ پراجیکٹ کا دورہ - فوٹو: آئی ایس پی آر 

آرمی چیف کا سندھ کے گدرا سیکٹر میں اگلے مورچوں اور تھرکول پائلٹ پراجیکٹ کا دورہ - فوٹو: آئی ایس پی آر 

راولپنڈی: آرمی چیف جنرل قمر جاوید باوجوہ کا کہنا ہے کہ مقامی اور غیر ملکی سرمایہ کاروں کو کاروبار کے لیے پر امن ماحول فراہم کیا جائے گا اور پاک فوج ملک کی سرحدوں کی حفاظت کیلیے پرعزم ہے۔ 

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ نے سندھ کے گدرا سیکٹر میں اگلے مورچوں کا دورہ کیا، کورکمانڈر کراچی لیفٹیننٹ جنرل ہمایوں عزیز بھی آرمی چیف کے ہمراہ تھے، آرمی چیف نے فوجی دستوں کی پیشہ ورانہ تیاریوں اور بلند مورال کی تعریف کی۔

ترجمان پاک فوج کے مطابق آرمی چیف نے تھر کول پائلٹ پراجیکٹ کا بھی دورہ کیا جہاں  ایم ڈی فوجی فرٹیلائزر لیفٹیننٹ جنرل ریٹائرڈ طارق خان نے ان کا استقبال کیا، جنرل قمر جاوید باجوہ کو تھرکول پائلٹ پراجیکٹ سے متعلق تفصیلی بریفنگ دی گئی۔

اس موقع پر پاک فوج کے سربراہ نے کہا کہ ملک کی اندرونی سلامتی کی صورتحال بہتر ہونے سے غیر ملکی سرمایہ کاری کی راہ ہموار ہوئی، ملک میں کاروبار دوست ماحول کی فراہمی کے لیے اپنا کردار ادا کرتے رہیں گے جب کہ پاک فوج ملک کی سرحدوں کی حفاظت کیلیے پر عزم ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔