الیکشن میں مبینہ دھاندلی عامر لیاقت کا جواب غیر تسلی بخش قرار

این اے 245 میں بے ضابطگیوں کے ناقابل تردید شواہد موجود ہیں، فاروق ستار۔ فوٹو: فائل

---

الیکشن ٹربیونل نے ڈاکٹر فاروق ستار کی این اے 245 میں مبینہ دھاندلی سے متعلق درخواست پر پی ٹی آئی کے رکن قومی اسمبلی عامر لیاقت کے وکیل کو 14جنوری تک تفصیلی جواب جمع کرانے کا حکم دے دیا۔

سندھ ہائیکورٹ میں جسٹس عمر سیال پر مشتمل الیکشن ٹربیونل میں این اے 245 میں مبینہ دھاندلی سے متعلق درخواست کی سماعت ہوئی، فاروق ستار کی جانب سے وکیل محمد اکبر عدالت میں پیش ہوئے، پی ٹی آئی کے رہنما عامر لیاقت کے وکلا نے عدالت میں جواب جمع کرایا جس میں کہا گیا کہ عامر لیاقت گزشتہ دنوں سپریم کورٹ میں زیر سماعت مقدمے میں مصروف تھے جس کے باعث سماعت پر حاضر اور جواب جمع نہ کرا سکے، عدالت نے جمع کرایے گئے جواب کو غیر تسلی بخش قرار دیدیا۔

فاروق ستار کے وکیل ایڈووکیٹ محمد اکبر نے کہاکہ این اے 245 میں بے ضابطگیوں کے ناقابل تردید شواہد موجود ہیں، 22 ہزار بیلٹ پیپرز غائب ہیں، عامر لیاقت کو کام کرنے سے روکا جائے۔