امن کمیٹی باڑہ کے سربراہ میرعالم آفریدی قاتلانہ حملے میں جاں بحق

خیبرایجنسی: نامعلوم موٹرسائیکل سواروں کی فائرنگ سے امن کمیٹی باڑہ خیبر ایجنسی کے سربراہ میر عالم آفریدی جاں بحق ہوگئے۔

ایکسپریس نیوز کے مطابق خیبر ضلع میں اچینی خوڑ کے قریب نامعلوم موٹر سائیکل سواروں نے ملک میر عالم آفریدی پر فائرنگ کی جس کے نتیجے میں وہ موقع پر ہی جاں بحق ہوگئے۔ ملک میر عالم آفریدی پشاور سے باڑہ جارہے تھے کہ ٹول پلازہ حیات آباد کے قریب فائرنگ کا نشانہ بنے۔

پولیس کے مطابق فائرنگ کے واقعے کے بعد ٹارگٹ کلرز موقع سے فرار ہونے میں کامیاب ہوگئے، اطلاع ملتے ہی پولیس نے موقع پر پہنچ کر لاش پوسٹ مارٹم رپورٹ کے لئے اسپتال منتقل کر دی جب کہ اہم شواہد اکھٹے کرنے کے لئے پولیس کرائم سین یونٹ جائے وقوعہ پر پہنچ چکی ہے۔

واضح رہے ملک میر عالم آفریدی پر پانچ سال قبل ارباب روڈ کے قریب خودکش حملے میں زخمی ہوئے تھے۔