افغانستان میں خود کش دھماکے میں 15 سیکیورٹی اہلکار ہلاک گورنر محفوظ

دس کے قریب سیکیورٹی اہلکاروں اور شہریوں کو زخمی حالت میں اسپتال لایا گیا ہے۔ فوٹو : افغان میڈیا

---

افغانستان میں گورنر اور صوبائی انٹیلی جنس صدر کے قافلے پر خودکش حملے میں 15 سیکیورٹی اہلکار ہلاک اور 10 زخمی ہوگئے جب کہ دونوں اہم شخصیات محفوظ رہیں۔

بین الاقوامی خبر رساں ادارے کے مطابق افغانستان کے صوبے لوگر میں گورنر اور صوبائی انٹیلی جنس صدر کے قافلے پر خود کش حملہ کیا گیا ہے جس کے نتیجے میں 15 سیکیورٹی اہلکار ہلاک اور 10 زخمی ہوگئے۔

لوگر پولیس کے ترجمان شاہ پور احمد زئی نے بتایا کہ خود کش حملے میں گورنر لوگر محمد انور اسحاق زئی اور ان کے ہمراہ موجود این ڈی ایس کے صوبائی صدر محفوظ رہے۔

واقعے کے بعد 20 کے قریب سیکیورٹی اہلکاروں اور شہریوں کو زخمی حالت میں اسپتال لایا گیا ہے جن میں سے چند کی حالت نازک بتائی جارہی ہے جب کہ گورنر کے ہلاک ہونے کی افواہ بھی عام ہے۔

افغان طالبان نے گونر لوگر کے قافلے پر خود کش حملے کی ذمہ داری قبول کرتے ہوئے اہم حکام کے ہلاک ہونے کا دعویٰ کیا ہے تاہم سرکاری ذرائع سے کسی بڑے نقصان کی تصدیق نہیں کی گئی ہے۔