ٹنڈو محمد خان عدالت سے دُہرے قتل کا ملزم فرار 2 اہلکار معطل

مقتول ابراہیم کپری کے بیٹے سومار کپری کا کہنا تھا کہ ملزم پولیس کی ملی بھگت سے فرار ہوا ہے۔ فوٹو: فائل

---

سیشن کورٹ میں پیشی کے موقع پر دُہرے قتل کا ملزم پولیس کو چکمہ دے کر فرار ہو گیا۔

ایس ایس پی نے 2 اہلکاروں کو معطل کرکے لاک اپ کرا دیا، مقدمہ بھی درج۔ تفصیلات کے مطابق 2007 میں بلڑی شاہ کریم تھانے کی حدود میں لوٹ مار کے دوران مزاحمت پر 2افراد ابراہیم کپری اور گلاب کپری کو قتل کرنے کے الزام میں قید ملزم مصری چانگ کو بدھ کے روز نارا جیل سے پیشی کے لیے سیشن کورٹ ٹنڈو محمد خان لایا گیا تھا، جہاں ملزم پولیس اہلکاروں کو چکمہ دے کر فرار ہو گیا۔ مقتول ابراہیم کپری کے بیٹے سومار کپری کا کہنا تھا کہ ملزم پولیس کی ملی بھگت سے فرار ہوا ہے جس سے ان کی اور ان کے اہل خانہ کی جان کو خطرہ لا حق ہو گیا ہے۔

انھوں نے حکومت سے مطالبہ کیا ہے کہ انھیں تحفظ اور مفرور ملزم کو گرفتار کیا جائے۔ واقعے کی اطلاع پر ایس ایس پی ٹنڈو محمد خان ذوالفقار مہر نے ڈیوٹی میں غفلت برتنے پر 2 پولیس اہلکاروں اے ایس آئی اگھے ڈنو اور پولیس کانسٹبل سائیں بخش کو فوری طور پر معطل کر کے کوارٹر گارڈ کر دیا جبکہ سٹی تھانے پر دونوں اہلکاروں کے خلاف دفعہ 223,224,225 کے تحت مقدمہ بھی درج کر لیا گیا ہے۔ ایس ایس پی کا کہنا ہے کہ ملزم کی گرفتاری کے لیے چھاپے مارے جا رہے ہیں اور بہت جلد اسے گرفتار کر لیا جائے گا۔