روس نے مودی کو اپنے سب سے اعلیٰ سول اعزاز سے نواز دیا

یہ اعزاز حاصل کرنے والے نریندرا مودی پہلے بھارتی وزیراعظم ہیں (فوٹو : فائل)

---

روس نے بھارتی وزیر اعظم نریندرا مودی کو اپنے سب سے اعلیٰ سویلین اعزاز 'سینٹ اینڈریو' سے نواز دیا۔

بین الاقوامی خبر رساں ادارے کے مطابق ماسکو حکومت نے بھارتی وزیراعظم نریندرا مودی کو روس سے مضبوط اور خوشگوار خارجہ تعلقات اور بے مثل معاشی شراکت داری پر اعلیٰ ترین سول ایوارڈ سینٹ اینڈریو عطا کیا ہے۔

بھارت میں موجود روسی سفارت خانے نے وزیراعظم مودی کو سب سے بڑے سول اعزاز سے نوازنے کے متعلق آگاہ کرتے ہوئے بتایا کہ وزیراعظم مودی کی پالیسیوں سے روس اور بھارت کے درمیان خارجہ تعلقات میں بہتری آئی اور دونوں ممالک کے درمیان دو طرفہ تجارت میں بے پناہ اضافہ ہوا۔

بھارتی وزیراعظم نریندرا مودی نے سماجی رابطے کی ویب سائٹ ٹویٹر پر روس کا شکریہ ادا کرتے ہوئے کہا کہ دونوں ممالک کے درمیان دیرپا تعلقات سے دونوں ممالک کا مستقبل روشن ہے جس کے ثمرات عام شہریوں تک بھی پہنچیں گے۔

Indian Prime Minister Narendra Modi received the Order of St Andrew for outstanding achievements in promoting partnership with Russia https://t.co/mdTIVoFDJ5

— President of Russia (@KremlinRussia_E) April 12, 2019

واضح رہے کہ جنگی جنون میں مبتلا بھارت اور روس کے درمیان دنیا کے سب سے بڑے میزائل سسٹم ایس-400 کی خریداری کے معاہدے پر دستخط کیے گئے تھے جس کے لیے روسی صدر نے بھارت کا دورہ بھی کیا تھا۔