ننھے برطانوی شہزادے کوبن مانس سے تشبیہ دینے پر رپورٹر برطرف

بی بی سی ریڈیو کے میزبان کو نسل پرستانہ پوسٹ پر ملازمت سے فارغ کیا گیا۔ فوٹو : فائل

---

برطانوی نشریاتی ادارے بی بی سی ریڈیو کے میزبان ڈینی بیکر کو شاہی جوڑے کے یہاں ننھے مہمان کی آمد پر تضحیک آمیز پوسٹ کرنے پر ملازمت سے فارغ کردیا گیا ہے۔

برطانوی نشریاتی ادارے 'بی بی سی' نے اپنے ایک ریڈیو پروگرام کے میزبان اور صحافی ڈیبی بیکر کو ملازمت سے برطرف کردیا ہے، ڈینی بیکر نے اپنی ٹویٹ میں شاہی خاندان میں ننھے شہزادے کی آمد پر نسل پرستانہ پوسٹ کی تھی۔

ڈینی بیکر نے سماجی رابطے کی ویب سائٹ ٹویٹر پر ایک تصویر شیئر کی جس میں ایک جوڑا بن مانس (چمپینزی) کے بچے کو ہاتھ میں تھامے اسپتال سے باہر نکل رہا ہوتا ہے، ڈینی بیکر نے تصویر کا کیپشن 'ننھا شہزادہ اسپتال سے باہر آرہا ہے' دیا۔



ڈینی بیکر کی اس تصویر اور کیپشن کو شہزادی میگھن مارکل کے سیاہ فام پس منظر رکھنے پر طنز سمجھا گیا اور سوشل میڈیا پر صحافی کو آڑے ہاتھوں لیا گیا جس پر صحافی نے ناصرف معافی مانگی بلکہ ٹوئٹ بھی حذف کردی تھی۔

یہ خبر بھی پڑھیں : پرنس ہیری اورمیگھن مارکل کے ننھے شہزادے کی تصاویرمنظرعام پر

واضح رہے کہ شہزادی میگھن مارکل امریکی شہری ہیں، ان کے والد سفید فام امریکی شہری جب کہ والدہ سیاہ فام افریقی نژاد امریکی شہری ہیں جس پر انہیں شہزادے ہیری سے شادی کے وقت بھی کچھ حلقوں کی جانب سے تنقید کا سامنا تھا۔