نئی ایمنسٹی اسکیم علیمہ خان اور جہانگیر ترین کیلیے لائی گئی، مریم اورنگزیب

اسٹاف رپورٹر  جمعـء 17 مئ 2019
ایمنسٹی سے اب سب سے زیادہ وزیر اعظم اور ان کے دائیں بائیں بیٹھے چور فائدہ اٹھائیں گے (فوٹو: فائل)

ایمنسٹی سے اب سب سے زیادہ وزیر اعظم اور ان کے دائیں بائیں بیٹھے چور فائدہ اٹھائیں گے (فوٹو: فائل)

 لاہور: مسلم لیگ (ن) کی سیکریٹری اطلاعات مریم اورنگزیب نے کہا ہے کہ نئی ایمنسٹی اسکیم کے ذریعے علیمہ باجی کو سلائی مشینوں اور جہانگیر ترین کو مالی اور باورچیوں کے ذریعے کمائی غیر قانونی جائیداد قانونی بنانے کا ایک اور شاندار موقع فراہم کردیا گیا ہے۔

اپنے بیان میں انہوں ںے کہا کہ عمران صاحب ’حلال‘ ایمنسٹی اسکیم لائے ہیں تاکہ علیمہ باجی اور جہانگیر ترین اپنی غیر قانونی جائیدادوں کو ایک بار پھر حلال کرالیں، مسلم لیگ (ن) کی طرف سے لائی گئی ایمنسٹی اسکیم میں عوامی نمائندے اور ان کے بیوی، بچے، بہن بھائی فائدہ نہیں اٹھا سکتے تھے لیکن پی ٹی آئی کی ’حلال اسکیم‘ میں دانستہ یہ شق نکال دی گئی اور اب عوامی نمائندوں کے بیوی، بچے، بہن بھائی بھی فائدہ اٹھاسکتے ہیں تاکہ علیمہ باجی ایک مرتبہ پھر فیضیاب ہوسکیں۔

مرکزی سیکریٹری اطلاعات مسلم لیگ (ن) نے کہا کہ عمران صاحب کی ایمنسٹی سے اب سب سے زیادہ وہ اور ان کے دائیں بائیں بیٹھے چور فائدہ اٹھائیں گے، عمران صاحب نے پارلیمنٹ سے ایمنسٹی اسکیم کی تفصیلات چھپائیں کیونکہ اپنی غیر قانونی بے نامی جائیدادیں قانونی کروانی تھیں، عمران صاحب ایمنسٹی اسکیم علیمہ باجی، جہانگیر ترین اور اپنے دوستوں اور وزراء کی سہولت کے لیے لائے ہیں۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔