خیبر پختونخوا میں عیدالفطر منگل کو منائی گئی

مرکزی عیدگاہ چارسدہ روڈ پر نماز عیدالفطر کا سب سے بڑا اجتماع منعقد ہوا۔ فوٹو: فائل

---

ملک بھر میں ایک ہی دن عید نہ ہوسکی تمام صوبوں میں عید آج لیکن صوبہ خیبر پختونخوا میں سرکاری سطح پر عید الفطر منگل کو منائی گئی۔

پشاور میں مفتی شہاب الدین پوپلزئی کی مسجد قاسم علی خان کو پھر چاند نظر آگیا جس پر خیبر پختونخوا کی حکومت نے بھی منگل کو عید منانے کا اعلان کیا۔ صوبائی دارالحکومت پشاور سمیت خیبر پختونخوا کے دیگر شہروں میں نماز عید کے چھوٹے بڑے اجتماعات منعقد ہوئے جس کے دوران ملکی سلامتی کے لیے دعائیں مانگی گئیں۔

وفاقی سطح پر کیے گئے اعلان کے مطابق خیبر پختونخوا کے کئی علاقوں میں لوگوں کی بڑی تعداد نے روزہ رکھا ہے، ان کا موقف ہے کہ وہ 28 روزوں پر عید نہیں کرسکتے۔

خیبر پختونخوا میں عید پر وفاقی وزیر برائے سائنس اینڈ ٹیکنالوجی فواد چوہدری نے اپنے ٹویٹ میں کہا کہ جن کو شوال کا چاند دکھائی دیا ہے میڈیا ان کے انٹرویو کرے تو لگ پتا جائے گا ایسی شہادتیں دینے والوں کے خلاف مقدمے درج ہونے چاہئیں۔

علاوہ ازیں صوبائی وزیر اطلاعات نے کہا تھا کہ ایک عید کے لیے مفتی پوپلزئی کو مرکزی رویت ہلال کمیٹی کا چئیرمین بنادیا جائے۔