میکسیکو ایئرلائن کا پناہ گزینوں کی واپسی کیلیے ایک ڈالر ٹکٹ کا اعلان

ایئرلائن کی یہ پیشکش 30 جون تک کے لیے ہے۔ فوٹو : فائل

---

میکسیکو ایئرلائن نے وسطی امریکا کے ممالک سے پناہ گزینوں کی واپسی کے لیے سستی ترین پرواز کا اعلان کیا ہے جس کا ٹکٹ محض ایک ڈالر کا ہوگا۔

بین الاقوامی خبر رساں ادارے کے مطابق میکسیکو ایئرلائن نے وسطی امریکی ممالک کوسٹا ریکا، ال سلواڈور اور گوئٹے مالا سے غیر قانونی طور پر مقیم پناہ گزینوں کو بغیر سفری دستاویز کے بھی میکسیکو واپسی کے لیے خصوصی پروازوں ' خاندانوں کی واپسی پروگرام' کا اعلان کیا ہے جس کا ٹکٹ محض ایک ڈالر ہوگا۔

میکسیکو کی ایئرلائن 'ولاریس' نے اپنے اعلامیہ میں کہا ہے کہ پناہ گزینوں کے لیے ایک ڈالر پرواز کا سلسلہ 30 جون تک جاری رہے گا، اس پیشکش سے امریکی سرحد کے قریب تیجوانا اور سیوداد جواریز ایرپورٹس پر پھنسے تارکین وطن بھی فائدہ اٹھا سکیں گے۔

ایک ڈالر پرواز سے فائدہ اُٹھانے والوں کو میکسیکو ایئرپورٹ پر عالمی پروازوں پر عائد 45 ڈالر ٹیکس سے بھی چھوٹ دی جائے گی جب کہ بالغ پناہ گزینوں کو اپنا شناختی کارڈ اور بچوں کو پیدائشی سند دکھانا ہوگی۔

واضح رہے کہ امریکا میں پناہ گزینوں کیخلاف سخت کارروائی کے بعد صدر ٹرمپ نے مزید کارروائی کا عندیہ دیا ہے جس کے پیش نظر ایئرلائن نے یہ قدم اُٹھایا ہے۔