سابقہ بورڈ حکام نے امتیازی سلوک کیا، سلمان بٹ

محمد یوسف انجم  منگل 20 اگست 2019
 قومی ٹیم کیلیے زیر غور نہ لانے کی وجوہات شہریاراور سیٹھی ہی بتا سکتے ہیں، سابق کپتان۔ فوٹو: فائل

 قومی ٹیم کیلیے زیر غور نہ لانے کی وجوہات شہریاراور سیٹھی ہی بتا سکتے ہیں، سابق کپتان۔ فوٹو: فائل

 لاہور:  سلمان بٹ نے ماضی کے بورڈ حکام پر امتیازی سلوک کا الزام عائد کر دیا۔

پاکستان کرکٹ کی سب سے بڑی ویب سائٹ www.cricketpakistan.com.pkکے پروگرام ’’ان سائیڈ آئوٹ‘‘ میں بات چیت کرتے ہوئے صرف محمد عامر کو خصوصی رعایت دینے کے سوال پرسلمان بٹ نے کہا کہ میری 5سال کی سزا مکمل ہوگئی تھی، ہرسال ڈومیسٹک کرکٹ میں تسلسل کے ساتھ عمدہ کارکردگی کا بھی مظاہرہ کیا، میرے معاملے میں امتیازی سلوک کیوں کیا گیا، اس کا جواب سابق چیئرمین پی سی بی شہریار خان اور نجم سیٹھی ہی دے سکتے ہیں کہ کیوں ایک کھلاڑی کیلیے الگ اور دوسروں کیلیے الگ رویہ رکھا گیا۔

انھوں نے کہا کہ میں نے ڈومیسٹک کرکٹ میں اپنی ذاتی کارکردگی کے حوالے سے کوئی کسر نہیں چھوڑی، کوئی بھی سمجھ سکتا ہے کہ میری ٹیم میں جگہ بنتی ہے یا نہیں، ورلڈکپ میں پاکستان صرف 3 اوپنرز کے ساتھ گیا۔ ٹیسٹ میچز میں مسلسل شکستیں ہورہی ہیں لیکن کسی نے کچھ بھی تبدیل نہیں کرنا چاہا،امید ہے کہ نئی مینجمنٹ میرٹ پر فیصلے کرے گی۔

سلمان بٹ نے کہا کہ ماضی میں ڈومیسٹک کرکٹ کے پرفارمرز کو نظر انداز کرتے ہوئے من پسند فیصلے کیے جاتے رہے، امید ہے کہ اب ایسا نہیں ہوگا، ڈومیسٹک کرکٹ میں اچھی کارکردگی دکھانے والوں کو ترجیح دیں تب ہی نیا سسٹم کامیاب ہوسکتا ہے۔

انھوں نے کہا کہ پاکستان نے خوش قسمتی سے اپنی 75فیصد کرکٹ یواے ای میں کھیلی،ایک ہی جیسے کرکٹرز کھیل رہے ہیں،کیا میں نے ماضی میں ہر طرح کی کنڈیشنز میں اچھی کارکردگی نہیں دکھائی۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔