پاؤں میں زخم کے باعث ذیابیطس کے لاکھوں میں مریض معذور ہو سکتے ہیں ماہرین طب

ملک میں پاؤں میں زخم کے علاج کے لیے 115 کلینک کام کررہے ہیں ۔فوٹو : فائل

---

پاکستان ورکنگ گروپ آن ذیابیطس فٹ کے چیئرمین پروفیسر عبدالباسط نے کہا ہے کہ ملک میں اس وقت 40 لاکھ افراد کو ذیابیطس کی وجہ سے پاؤں کے زخموں کاسامنا ہے۔

زخم کے باعث ذیابیطس کے لاکھوں مریضوں کی ٹانگیں ضائع ہوسکتی ہیں، وہ جمعہ کو پریس کلب میں پریس کانفرنس سے خطاب کررہے تھے، اس موقع پر ڈاکٹر زاہد میاں، ڈاکٹر ظفر اقبال عباسی، ڈاکٹر عصمت نواز و دیگر بھی موجود تھے،انھوں نے کہا کہ پاؤں کے زخم کے بروقت علاج سے مریضوں کی ٹانگ کو کٹنے سے بچایا جاسکتا ہے، انھوں نے کہا کہ ذیابیطس فٹ (foot)کی 3 علامات ہیں پہلی علامت یہ ہے کہ مریض کی نبض متاثر ہوتی ہے جبکہ دوسری علامت میں پاؤں میں جلن یا دکھن ہوتی ہے، تیسری علامت میں شریان سکڑنے سے پاؤں ٹھنڈے ہوجاتے ہیں۔



انھوں نے کہا کہ اس وقت ملک میں پاؤں میں زخم کے علاج کے لیے 115 کلینک کام کررہے ہیں جبکہ 1700 سے زائدکلینک قائم کرنے کی ضرورت ہے، اس کے علاوہ 3 ہزار پٹی والے بھی تیارکرنا ہوں گے،انھوں نے کہا کہ ذیابیطس فٹ کے لیے صحت کا کل بجٹ بھی ناکافی ہے اس سلسلے میں نجی شعبے کو آگے آنا ہوگا، انھوں نے کہا کہ پاکستان ورکنگ گروپ آن ذیابیطس فٹ اور بقائی انسٹیٹیوٹ آف ڈایا بیٹولوجی اینڈ انڈو کرائنو لوجی کے باہمی تعاون سے 28 اور 29 ستمبر کو مقامی ہوٹل میں ذیابیطس کی وجہ سے پاؤں میں ہونے والے زخموں سے متعلق سمپوزیم منعقد کیا جارہا ہے۔