مصباح الحق کو اپنے ’’ناکام‘‘ پروفیسر دوست کی یاد ستانے لگی

کیریبیئن لیگ کے9میچز میں 17.77کی اوسط اوربغیر ففٹی کے صرف 160رنز۔ فوٹو: فائل

---

مصباح الحق کو اپنے ''ناکام'' پروفیسر دوست کی یاد ستانے لگی جب کہ دورہ آسٹریلیا کیلیے مسلسل آؤٹ آف فارم محمد حفیظ کی واپسی پر غور ہونے لگا۔

ورلڈکپ کے بعد سینٹرل کنٹریکٹ سے محروم ہونے والے محمد حفیظ کو سابق ہیڈ کوچ مکی آرتھر نے مستقبل کے پلان سے باہر کردیا تھا،ان کو پری سیزن کیمپ کے بعد سری لنکا سے سیریز کیلیے بھی زیر غور نہیں لایا گیا، بولنگ کوچ بننے سے قبل وقار یونس نے تو انھیں ریٹائرمنٹ کا مشورہ بھی دیدیا تھا،البتہ اب پرانے دوست چیف سلیکٹر و ہیڈ کوچ مصباح الحق آسٹریلیا سے ٹی ٹوئنٹی سیریز میں حفیظ کو آزمانے پر غور کر رہے ہیں۔

مشکلات میں گھرے آل راؤنڈرکا ستارہ تاحال گردش سے باہر نہیں نکل سکا، سینٹ کٹس اینڈ نیوس پیٹریاٹس کی جانب سے کیریبیئن لیگ میں بھی ان کی کارکردگی غیرمعیاری رہی، انھوں نے 9میچز میں 17.77کی اوسط سے صرف 160 رنز بنائے،اس میں کوئی نصف سنچری شامل نہیں تھی۔ سب سے بڑی اننگز 37کی رہی۔

دوسری جانب شعیب ملک بھی قومی ٹیم سے نظر انداز لیکن سی پی ایل میں گیان ایمازون کی طرف سے مسلسل عمدہ کارکردگی کا مظاہرہ کررہے ہیں، آل راؤنڈر سری لنکا سے ہوم سیریز کھیلنا چاہتے تھے مگر کسی نے انھیں لفٹ نہیں کرائی، وہ ویسٹ انڈیز میں 78.25کی ایوریج اور 128.27کے اسٹرائیک ریٹ سے 313رنز بنا کرچھٹے کامیاب ترین بیٹسمین ہیں، ان کی سب سے بڑی اننگز ناقابل شکست 73 رنز رہی۔

لیگ کے ٹاپ10 بیٹسمینوں میں برینڈن کنگ 453 رنز کے ساتھ سرفہرست ہیں،اس کے بعد لینڈل سیمنز429، گلین فلپس374، جانسن چارلس 341، کیرون پولارڈ 326، شعیب ملک 313، چندرپال ہیمراج 298، جے پال ڈومینی281، لوری ایوانز274 اور ایون لوئیس265 کے نام موجود ہیں۔

پاکستان کی سری لنکا کی نو آموز ٹیم کیخلاف انتہائی ناقص کارکردگی کے بعد آئندہ سال آسٹریلیا میں ہونے والے ورلڈ ٹی ٹوئنٹی کیلیے شعیب ملک کو زیر غور لائے جانے کے امکانات بڑھ گئے ہیں۔