کینٹ اسٹیشن پر نصب لیگج اسکیننگ مشین خراب

کینٹ اسٹیشن آنے والے مسافروں کا سامان عام اسکینر سے گزار کر چیک کیا جاتا ہے،لگیج اسکیننگ مشین کی خرابی کے بارے میں علم نہیں ہے، ڈی سی او ریلوے۔ فوٹو: فائل

---

ریلوے حکام نے ٹرینوں کے بڑے حادثات سے بھی سبق حاصل نہ کیا۔

ریلوے افسران کی سنگین غفلت سامنے آگئی کراچی کے مصروف ترین کینٹ اسٹیشن پر نصب لگیج اسکیننگ مشین کئی ماہ سے خراب پڑی ہے جس کی وجہ سے مسافروں کا سامان بغیر چیکنگ کے ٹرینوں میں سوار کیا جانے لگا ہے، کینٹ اسٹیشن سے روانہ ہونے والی ایک درجن سے زائد ٹرینوں میں روزانہ ہزاروں مسافروں سفر کرتے ہیں۔

ریلوے ذرائع کے مطابق مسافروں کا سامان لگیج اسکیننگ مشین خراب ہونے کے باعث چیک نہیں کیا جاتا، لگیج مشین کی خرابی کسی بھی بڑے حادثے کا سبب بن سکتی ہے کئی ماہ گزرنے کے باوجود لگیج اسکیننگ مشین کی مرمت نہیں کرائی جاسکی ہے، ریلوے پولیس کے پاس فنڈز کی کمی کے باعث مشین کی مرمت کی جانب دھیان نہیں دیا گیا، ریلوے عملے کے پاس موجود میٹل ڈٹیکٹرز بھی خستہ حالی کا شکار ہیں۔

ڈی سی او کراچی ریلوے جنید اسلم نے رابطہ کرنے پر بتایا کہ کینٹ اسٹیشن آنے والے مسافروں کا سامان عام اسکینر سے گزار کر چیک کیا جاتا ہے لگیج اسکیننگ مشین کی خرابی کے بارے میں علم نہیں ہے انھوں نے کہا کہ میں فی الحال ایک اہم میٹنگ میں ہوں زیادہ تفصیلات نہیں بیان نہیں کر سکتا۔