ٹائی ٹینک جہاز میں بجایا جانے والا وائلن ریکارڈ 9 لاکھ پاونڈ میں نیلام

وائلن کی نیلامی 50 پاونڈ سے شروع ہوئی اور چند منٹوں میں ٹائی ٹینک جہاز کے ایک ٹکرے کی نیلامی کا سابقہ ریکارڈ جو کہ 2 لاکھ 20 ہزار پاونڈ کا تھا توڑ دیا۔ فوٹو؛ اے ایف پی

---

ٹائی ٹینک جہاز ڈوبتے وقت مسافروں کو حوصلہ دینے کے لئے بجایا جانے والا تاریخی وائلن ریکارڈ 9 لاکھ پاونڈ (ساڑھے 14 لاکھ ڈالر) میں نیلام کر دیا گیا۔

غیر ملکی خبر رساں ایجنسی کے مطابق جنوب مشرقی لندن کے ہنری ایلڈرج اینڈ سن نامی نیلام گھر کی ترجمان کرسٹن ایلڈرج کا کہنا ہے کہ ٹائی ٹینک کا وائلن ایک برطانوی کلکٹر نے بذریعہ ٹیلی فون بولی لگا کر خریدا، وائلن کی نیلامی 10 منٹ سے بھی کم وقت میں مکمل ہوئی جس پر وہ بہت خوش ہیں۔ کرسٹن ایلڈرج کا کہنا ہے کہ نیلام گھر کو تمام ٹیکسز کے ساتھ10 لاکھ 50 ہزار 30 پاونڈ ادا کئے گئے، وائلن کی نیلامی 50 پاونڈ سے شروع ہوئی اور چند منٹوں میں اس نے ٹائی ٹینک جہاز کے ایک ٹکرے کی نیلامی کا سابقہ ریکارڈ جو کہ2 لاکھ 20 ہزار پاونڈ کا تھا توڑ دیا۔

واضح رہے کہ 1912 میں شمالی اٹلانٹک میں برفانی چٹان سے ٹکرانے کے بعد تباہ ہونے والے ٹائی ٹینک جہاز کی باقیات میں سے ملنے والا وائلن کئی دہائیوں سے گم تھا لیکن 2006 مین شمال مشرقی لندن کے ایک گھر سے یہ وائلن مل گیا تاہم اس وقت اس کی اصلیت پر سوال کئی اٹھائے گئے لیکن سائنسدانوں نے یہ مسئلہ بھی بعدازاں حل کر دیا۔