قوت گویائی سے محروم مداح نےعدنان صدیقی کا دل جیت لیا وڈیو وائرل

قوت گویائی سے محروم مداح نے شہوار کو تھپڑ مارنے کے سین کی منظر کشی کی جسے عدنان صدیقی نے کیمرے میں محفوظ کرلیا

ویب ڈیسک December 04, 2019

عدنان صدیقی نے قوت گویائی سے محروم مداح کی ویڈیو سوشل میڈیا پر وائرل کردی۔ فوٹو : فائل

ڈرامے 'میرے پاس تم ہو' نے پاکستانی ڈرامہ انڈسٹری کے اس سنہرے دور کی یاد تازہ کردی ہے جب یہ ڈرامے خاندان کا حصہ ہوا کرتے تھے، گھر کے ہر فرد کی پسند اور ہر سماجے حلقے کے موضوع کا محور ہوا کرتے تھے، نشریات کے وقت سڑکیں سنسان ہوجایا کرتی تھیں اور لوگ قسط دیکھنے کیلیے اپنے اہم ترین کام بھی چھوڑ دیا کرتے تھے۔

عدنان صدیقی اس ڈرامے میں کامیاب بزنس مین شہوار (عدنان صدیقی) کا کردار ادا کر رہے ہیں، ایک ایسا تاجر جو محبت کو خریدنے کا دعویٰ رکھتا ہے جہاں شہوار کے تکبر اور گھمنڈ نے دانش (ہمایوں سعید) کے لیے مداحوں کے دل میں نرم گوشہ پیدا کردیا ہے وہیں بیوی کی بے وفائی نے مداحوں کی ساری ہمدردی دانش کی جھولی میں ڈال دی ہے۔

یہی وجہ ہے کہ ایک قسط میں جب دانش، شہوار کے دفتر میں آکر اس کے منہ پر تھپڑ رسید کرتا ہے تو یہ منظر دیکھ کر مداح خوشی گویا پاگل ہوجاتے ہیں، یہ سین سوشل میڈیا پر سب سے زیادہ شیئر کرنے والا ڈرامے کا کلپ بن گیا، اس سین پر میمز بنیں، خبریں بنیں، ہیڈ لائنز لگیں اور کون ہے جو اس منظر کے سحر سے متاثر ہوئے بغیر نہ رہ سکا ہو۔

اس بات کا اندازہ عدنان صدیقی کی جانب سے شیئر کی گئی ایک ویڈیو سے بھی لگایا جا سکتا ہے، جس میں قوت گویائی سے محروم ایک مداح نے انہیں چہل قدمی کرتے ہوئے نہ صرف پہچان لیا بلکہ اشاروں کی زبان سے تھپڑ مارنے کا سین دہرایا جس پر عدنان صدیقی قہقہہ لگائے بغیر نہ رہ سکے۔

عدنان صدیقی نے ویڈیو شیئر کرتے ہوئے لکھا کہ خدا کا جتنا شکر ادا کروں کم ہوں۔ ڈرامہ میرے پاس تم ہو سے جو مقبولیت ملی اور جس طرح لوگ داد و تحسین دے رہے ہیں اس پر میں آپ سب کا شکر گزار ہوں۔ اور بالخصوص اس مداح کا شکریہ ادا کرتا ہو جو قوت گویائی سے محروم ہے اور ابھی آپ کو تھپڑ مارنے کے پورے سین کو انوکھے انداز سے کرکے دکھائے گا۔