معروف بھارتی اداکار نواز الدین صدیقی کی 26 سالہ بہن انتقال کر گئیں

صائمہ صدیقی 18 سال کی عمر سے بریسٹ کینسر سے جنگ لڑ رہی تھیں۔ فوٹو : فائل

---

معروف بھارتی اداکار نواز الدین کی 26 سالہ بہن صائمہ صدیقی نے کینسر کے مرض میں زندگی کی بازی ہار دی۔

بھارتی میڈیا کے مطابق اداکار نواز الدین صدیقی کی بہن صائمہ کو 18 سال کی عمر میں بریسٹ کینسر جیسے موذی مرض کی تشخیص ہوئی تھی اور 8 سال تک کینسر سے نبرد آزما ہونے کے بعد آج انہوں نے پونے کے ایک اسپتال میں دم توڑ دیا۔

نواز الدین صدیقی اس وقت ایک فلم کی شوٹنگ کے سلسلے میں امریکا میں مقیم ہیں، اُن کی بہن کی نماز جنازہ اتر پردیش میں آبائی گاؤں میں ادا کی جائے گی۔ نواز الدین صدیقی کینسر سے لڑنے والی بہن کی حوصلہ افزائی کرتے اور ہمت بندھاتے رہتے تھے۔

نواز الدین صدیقی نے پہلی مرتبہ گزشتہ برس ٹویٹر پر اپنی ایک ٹویٹ میں بہن کے بریسٹ کینسر میں مبتلا ہونے کے باوجود بہادری کے ساتھ بیماری کا مقابلہ کرنے پر حوصلہ افزائی کیلیے ٹویٹ بھی کی تھی۔

My sister ws diagnosed of advanced stage #breastcancer @ 18
bt it ws her will power & courage dat made her stand agnst all d odds
she turns 25 2day & still fighting
M thankful 2 Dr.@koppiker & @Lalehbusheri13 fr motivating her
& m rly grateful 2 @resulp Sir fr introducng me 2 dem pic.twitter.com/xHsBK8uJDP

— Nawazuddin Siddiqui (@Nawazuddin_S) October 13, 2018

واضح رہے کہ بھارت میں بریسٹ کینسر کے مرض میں تشویشناک حد تک اضافہ ہوا ہے، ایک لاکھ خواتین میں سے 25 کو بریسٹ کینسر ہوتا ہے جن میں سے 13 جان لیوا ثابت ہوتے ہیں۔