8سے10محرم تک ایم اے جناح روڈ بند رہے گی سیکیورٹی پلان کو حتمی شکل دیدی گئی

جلوسوں کی نگرانی 1250سی سی ٹی وی کیمروں کی مدد سے کی جائیگی،گرومندر سے کھارادر تک رہائشی عمارتوں کے مکینوں کا مکمل ڈیٹا مرتب کرنے کی ہدایت. فوٹو: ایکسپریس / فائل

---

محکمہ داخلہ سندھ نے محرم الحرام کیلیے کراچی میں سیکیورٹی پلان کو حتمی شکل دیدی، پلان کے تحت8 محرم الحرام کی رات سے10محرم الحرام تک مرکزی جلوسوں کی سیکیورٹی کے لیے نمائش چورنگی سے امام بارگاہ حسینیہ ایرانیاں کھارادرتک ایم اے جناح روڈ اور اطراف کی سڑکوں کو عام ٹریفک کے لیے بند کردیا جائیگا ۔

جبکہ ان علاقوں میں کاروباری سرگرمیاں بھی بند رکھی جائیں گی،محرم الحرام میں کراچی میں12ہزار سے زائد پولیس اور دیگر قانون نافذ کرنیوالے اداروں کے اہلکاروں کو مرکزی جلوسوں کی سیکیورٹی کے لیے تعینات کیا جائے گا، شہر بھر میں محرم کے جلوسوں کی نگرانی 1250سی سی ٹی وی کیمروں کی مدد سے کی جائے گی،محرم الحرام میں کسی بھی ہنگامی صورتحال سے نمٹنے کے لیے پولیس اور رینجرز کے 500کمانڈوز پر مشتمل کوئیک رسپانس فورس بھی کام کریگی،یہ رسپانس فورس مرکزی جلوس اور حساس علاقوں میں تعینات کی جائے گی۔

تفصیلات کے مطابق محکمہ داخلہ سندھ نے پولیس ،سول انتظامیہ اور قانون نافذ کرنے والے اداروں کی مدد سے یکم محرام الحرام سے10 محرم الحرام تک کے لیے سیکیورٹی پلان کو حتمی شکل دیدی،سیکیورٹی پلان کے تحت کراچی کو ایسٹ، ویسٹ اور ساؤتھ زونز میں تقسیم کیا گیا ہے اور ہر زون کا سیکیورٹی انچارج متعلقہ ڈی آئی جی ہوگاجبکہ اس کے ماتحت متعلقہ اضلاع کے ایس ایس پی اور ایس پی لیول کے افسران ڈویژن کی سطح پر سیکیورٹی امور کے انچارج ہونگے، محرم الحرام میں امام بارگاہوں اور دیگر مقامات پر ہونے والی مجالس کیلیے تھانے کی سطح پر سیکیورٹی کے انتظامات کیے جائینگے اور جس علاقے میں مجلس ہوگی۔



مجلس کا منتظم متعلقہ تھانے میں اس کی اطلاع کرے گا،ذرائع کے مطابق محکمہ داخلہ سندھ نے 8محرم سے 10محرم تک مرکزی جلوسوں کیلیے سیکیورٹی کے مربوط انتظامات کی ہدایت جاری کی ہے اور ان انتظامات کے تحت متعلقہ تھانوں اور خفیہ اداروں کے اہلکاروں کو ہدایت جاری کی گئی ہے کہ انتہائی حساس امام بارگاہوں کے اطراف جبکہ گرومندر سے حسینیہ ایرانیاں کھاردار تک آنے والی رہائشی عمارتوں کے مکینوں کا مکمل ڈیٹا مرتب کیا جائے، سیکیورٹی پلان کے مطابق جلوس کے مرکزی راستے پر آنیوالے تمام ذیلی راستوں کو8 محرم کی شب 9بجے سے مکمل طور پر سیل کردیا جائے گا۔

جبکہ ان راستوں میں آنے والی دکانوں کو بھی چیک کرنے کے بعد سیل کیا جائے گا، محکمہ داخلہ نے محرم کیلیے اپنے دفتر ،آئی جی ،ایڈیشنل آئی جی ،تینوں زونز کے ڈی آئی جیز،متعلقہ اضلاع کے ایس ایس پیز کے دفاتر میں کنٹرول روم قائم کرنے کی ہدایات جاری کردی ہیں، محکمہ داخلہ کے ذرائع کا کہنا ہے کہ کراچی میں کے ایم سی اور متعلقہ اداروں کو ہدایت کردی گئی ہے کہ شہر میں تمام سی سی ٹی وی کیمروں کو فعال کیا جائے۔

سندھ حکومت نے محرم الحرام میں سیکیورٹی انتظامات بہتر بنانے کیلیے صوبے بھرمیں دفعہ 144 کے تحت لائسنس یافتہ اسلحہ لے کر چلنے پر پابندی عائد کرنے کا فیصلہ کیا ہے یہ پابندی یکم محرم سے 12محرم تک کے لیے لگائی جائے گی، محرم الحرام میں اشتعال انگیز تقاریر کرنے اور مذہبی منافرت پھیلانے والے لٹریچر اور وال چاکنگ کرنیوالوں کیخلاف سخت کارروائی کا فیصلہ کیا گیاہے، محکمہ داخلہ کے ذرائع کے مطابق محرم الحرام کے ایام میں موٹر سائیکل کی ڈبل سواری پر پابندی لگانے پر بھی غور کیا جارہا ہے جس کی حتمی منظوری وزیر اعلیٰ سندھ دینگے۔