گوگل نے اسمارٹ فون کےلیے 44 زبانوں میں ترجمے کی ایپ پیش کردی

گوگل نے اسسٹنٹ میں انٹرپریٹر سہولت پیش کردی ہے جو 44 زبانوں میں ترجمے کی سہولت فراہم کرتی ہے (فوٹو: فائل)

---

گوگل نے مختلف ممالک میں سفر کرنے والوں اور اجنبی زبانوں سے پریشانی اٹھانے والوں کے لیے ایک زبردست ایپ پیش کردی ہے جسے 'گوگل انٹرپریٹر' کا نام دیا گیا ہے۔

دلچسپ بات یہ ہے کہ یہ سروس گوگل نے اسمارٹ فون کے لیے پیش کی ہے جو اس سے قبل اسمارٹ اسپیکر اور ڈسپلے کے لیے پیش کی گئی تھی۔

حقیقی وقت (ریئل ٹائم) میں ترجمہ کرنے والی یہ سروس اب شروع ہوچکی ہے اور بہ یک وقت اینڈروئیڈ اور آئی او ایس فون کے لیے پیش کی جارہی ہے۔ یاد رہے کہ یہ سروس گوگل اسسٹنٹ کے ساتھ کام کرتی ہے۔

اسے چلانے کے لیے گوگل اسسٹنٹ سے صرف اتنا کہیے: 'ہے گوگل بی مائی جرمن ٹرانسلیٹر' (گوگل میرے جرمن مترجم بن جاؤ)، اور گوگل انگریزی سے جرمن ترجمہ کرنے لگے گا۔ اس کےلیے انگریزی میں جملہ کہیں اور گوگل اسے جرمن زبان میں ترجمہ کرکے اسپیکر سے آواز کے ذریعے ظاہر کرے گا۔

اس طرح کل 44 زبانوں میں ایک دوسرے کا ترجمہ کیا جاسکتا ہے جن میں عربی، چیک، ولندیزی، فرانسیسی، جرمن، یونانی، اردو (ہندی)، اطالوی، انڈونیشیائی، کوریائی، منڈارین، تھائی، ہسپانوی، یوکرینی اور دیگر زبانیں شامل ہیں۔ اس کے اسمارٹ فیچر گفتگو کو جاری رکھنے میں مدد دیتے ہیں لیکن اس کے لیے موبائل آن لائن رکھنا ضروری ہوگا۔