حمزہ خان نے انڈر15 برٹش جونئیر اسکواش چیمپئن شپ جیت لی

 اسلام آباد: پاکستان کے نوجوان اسکواش اسٹار حمزہ خان نے شاندار کارکردگی کا مظاہرہ کرتے ہوئے برٹش جونیئر اسکواش چیمپئن شپ انڈر 15 کا ٹائٹل پاکستان کے نام کردیا۔

ورلڈ اسکواش فیڈریشن و برٹش اسکواش فیڈریشن کے زیر اہتمام برمنگھم میں کھیلے جانے والے انٹرنیشنل اسکواش ایونٹ میں دنیا بھر سے ٹاپ ریکنگ اسکواش کے کھلاڑیوں نے شرکت کی۔

نتائج کے مطابق پاکستان کے نوجوان اسکواش اسٹار محمد حمزہ خان نے انگلینڈ کے یوسف شیخ کو ایک دلچسپ مقابلے کے بعد شکست کا مزہ چکھایا۔ محمد حمزہ خان نے پہلا سیٹ 4-11 سے دوسرا سیٹ بھی 4-11 سے اور تیسرا سیٹ 7-11 سے جیت کر ٹائٹل پاکستان کے نام کیا۔

پاکستان اسکواش ٹیم کے منیجر حسین ادوانی نےایکسپریس سے گفتگو کرتے ہوئے کہا کہ پاکستان کی جیت سے ملک میں اسکواش کے نئے دور کا آغاز ہوگا، حمزہ خان مستقبل میں عالمی اسکواش کی درجہ بندی میں ملک کا نام روشن کرائے گا۔

دوسری جانب جونیئر اسٹار محمد حمزہ خان کا کہنا ہے کہ اس جیت کے لئے میں نے ٹارگٹ سیٹ کیا تھا، برٹش جونئیر کا ٹائٹل پاکستان کے نام کرتا ہوں اور مستقبل میں پاکستان کے اعزازت حاصل کروں گا۔