باپردہ خواتین کی حوصلہ افزائی کیلیے حجاب ریلی

خواتین کو حجاب کرنے کا مکمل حق ہر ملک میں حاصل ہونا چاہیے،مریم جمیل۔ فوٹو: فائل

---

باپردہ خواتین کی حوصلہ افزائی کے لیے پریس کلب سے حجاب ریلی نکالی گئی جب کہ ریلی میں کراچی بھر سے لڑکیوں اور خواتین نے شرکت کی۔

پریس کلب پر حجاب کے عالمی دن پر انٹرنیشنل ورلڈ حجاب ڈے آرگنائزیشن کی جانب سے ریلی نکالی گئی ریلی میں کراچی بھر سے ہر عمر کی خواتین اور لڑکیوں نے حجاب پہن کر شرکت کی، اس موقع پر ریلی میں شریک خواتین نے پلے کارڈز اٹھا رکھے تھے جن پر حجاب ڈے سے متعلق مختلف تحریریں درج تھیں۔

ریلی کے شرکا کا کہنا تھا کہ آج دنیا بھر کے مختلف ممالک میں حجاب کا عالمی دن یکم فروری کو منایا جارہا ہے یوم حجاب منانے کا مقصد باپردہ خواتین کی حوصلہ افزائی کرنا ہے، کسی بھی شعبہ میں پیشہ ور خواتین کے حجاب کرنے پر پابندی نہیں ہونی چاہیے۔

حجاب خواتین کے لیے رکاوٹ نہیں بلکہ صنف نازک کی طاقت ہے، خواتین کو حجاب کرنے کا مکمل حق اور پردے کے ساتھ ہر شعبے میں ملازمت کی اجازت ہونی چاہیے اس پلیٹ فارم سے خواتین کو یہ پیغام دے رہے ہیں کہ وہ خود مختار بنیں۔

عالمی یوم حجاب آرگنائزیشن کی پاکستانی سفیر مریم جمیل کا کہنا تھا کہ یوم حجاب منانے کا مقصد حجاب کرنے والی خواتین کی حوصلہ افزائی کرنا ہے، خواتین کو حجاب کرنے کا مکمل حق ہر ملک میں حاصل ہونا چاہیے ہر شعبہ میں حجاب کے ساتھ کام کرنے کی اجازت ہونی چاہیے جس کے لیے آواز اٹھانے کے لئے ہم کراچی پریس کلب پر جمع ہوئے ہیں۔