بین الاقوامی مارکیٹ کے بعد پاکستان میں بھی سونے کی قیمتوں میں کمی

دبئی بلین مارکیٹ کی نسبت مقامی صرافہ مارکیٹوں سونے کی فی تولہ قیمت 1500روپے کم ہے، نمائندہ بلین مارکیٹ۔ فوٹو : فائل

---

بین الاقوامی مارکیٹ میں سونے کی قیمتوں میں کمی کے باعث مقامی صرافہ مارکیٹوں میں بھی فی تولہ سونے کی قیمت میں 100 روپے کمی ہو گئی۔

بین الاقوامی بلین مارکیٹ میں فی اونس سونے کی قیمت 3 ڈالر کی کمی سے 1581 ڈالرکی سطح پر پہنچنےکےباعث مقامی صرافہ مارکیٹوں میں بھی پیرکوفی تولہ اور فی دس گرام سونے کی قیمتوں میں بالترتیب100روپے اور86روپے کی کمی واقع ہوئی ہے۔

قیمتوں میں کمی کے نتیجے میں کراچی، حیدرآباد، سکھر، لاہور، فیصل آباد، ملتان، اسلام آباد، راولپنڈی، پشاور اور کوئٹہ کی صرافہ مارکیٹوں میں فی تولہ سونے کی قیمت گھٹ کر 90 ہزار 800 روپے اور فی 10 گرام سونے کی قیمت گھٹ کر 77 ہزار 846 روپے ہوگئی۔

بلین مارکیٹ کے نمائندوں کا کہنا ہے کہ دبئی بلین مارکیٹ کی نسبت مقامی صرافہ مارکیٹوں سونے کی فی تولہ قیمت 1500 روپے کم ہے۔ اس کے برعکس فی تولہ چاندی کی قیمت بغیر کسی تبدیلی کے ایک ہزار روپے اور فی 10 گرام چاندی کی قیمت 857 روپے 33 پیسے پر مستحکم رہی۔