کورونا متاثرین کیلیے پاک بھارت سیریز کی تجویز

اسپورٹس رپورٹر  جمعرات 9 اپريل 2020
مقابلوں کا نتیجہ کچھ بھی ہو دونوں ممالک کی جیت ہوگی، شعیب اختر۔ (فوٹو: فائل)

مقابلوں کا نتیجہ کچھ بھی ہو دونوں ممالک کی جیت ہوگی، شعیب اختر۔ (فوٹو: فائل)

لاہور: کورونا متاثرین کی امداد کیلیے شعیب اختر نے پاک بھارت ون ڈے سیریز کی تجویز پیش کردی۔

ایک انٹرویو میں سابق ٹیسٹ کرکٹر شعیب اختر نے کہاکہ روایتی حریفوں پاکستان اور بھارت کے مقابلے دنیا بھر میں شائقین کی توجہ کا مرکز بنتے ہیں،  دونوں ملک 3 ایک روزہ میچز کی سیریز کھیل کر آمدنی برابر تقسیم کرکے ضرورت مندوں کی مدد کرسکتے ہیں،اس سیریزکا نتیجہ کچھ بھی ہو دونوں ٹیموں کی جیت ہوگی، پاکستان اور بھارت ایک دوسرے کے لیے کھیلیں گے، ایسا پہلی بار ہوگا کہ کسی ٹیم کے پرستار بھی ہار پر دلبرداشتہ نہیں ہوں گے، ویرات کوہلی کی سنچری پر ہم اور بابر اعظم کی تھری فیگر اننگز پر بھارتی خوش ہوں گے۔

انھوں نے کہا کورونا وائرس کی وجہ سے موجودہ حالات اس کی اجازت نہیں دیتے لیکن جتنی جلد ممکن ہو سیریز کا انعقاد کرکے فلاحی مقاصد حاصل کیے جا سکتے ہیں، کرکٹ کے ذریعے دونوں ملکوں کے محروم طبقے کا دکھ کم کرنے میں مدد ملے گی۔

انھوں نے تجویز پیش کی کہ کرکٹرز کو چارٹرڈ فلائٹ سے دبئی پہنچا کر  مقابلوں کا انعقاد کیا جا سکتا ہے، اگر سیریز ممکن ہوجائے تو دونوں ملکوں کے کرکٹ اور سفارتی تعلقات میں بہتری آئے گی۔

 

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔