تحریک طالبان ’حقانی گروپ‘ کے مجرم کو ساڑھے 12 سال قید کی سزا

مجرم کالعدم تنظیم کے لئے فنڈ جمع کررہا تھا، تفتیشی افسر۔ فوٹو: فائل

---

انسداد دہشت گردی کی عدالت نے تحریک طالبان حقانی گروپ کے مجرم کو مجموعی طور پر ساڑھے 12 سال قید کی سزا سنا دی۔

ایکسپریس نیوز کے مطابق کراچی سینٹرل جیل میں انسداد دہشت گردی کمپلیکس میں خصوصی عدالت نمبر 12 نے کالعدم تنظیم کے لیے فنڈنگ کرنے کے مقدمے کا فیصلہ سنادیا۔ عدالت نے کالعدم تحریک طالبان حقانی گروپ کے مجرم ضیا حسین کو مجموعی طور پر ساڑھے 12 سال قید کی سزا سنادی۔ عدالت نے مجرم کو 70 ہزار روپے جرمانہ ادا کرنے کا بھی حکم دیا۔

تفتیشی افسر کے مطابق مجرم ضیا حسین کو سی ٹی ڈی نے اتحاد ٹاؤن کراچی سے گرفتار کیا تھا، مجرم افغانستان میں امریکی فورسز کے ہاتھوں گرفتار بھی ہوچکا ہے اور گوانتاناموبے جیل سے رہائی کے بعد مجرم کو فورتھ شیڈول میں شامل کیا گیا تھا، مجرم کالعدم تنظیم کے لیے فنڈ جمع کررہا تھا۔